Hlăm dŭm thŭn êgao, ênoh phung knuă druh, đảng viên niê ti Dak Lak jing nai prŏng, nai prĭn, djăp hnơ̆ng čuăn brei ngă khua gĭt gai hlăm dŭm anôk bruă Đảng, Knŭk kna dŭm gưl ƀrư̆ lu. Lu phung bi hmô jing phung mniê đảng viên jing phung khua nôk bruă mkra mjing, mnia blei mbruă mguôp hŏng bruă duh mkra, răng kriê ênoh yuôm dhar kreh djuê ana jăk siam.

Hlăm hdră, phung bi ala lŏ bi hdơr knhuah gru kdrưh kơăm 95 thŭn mkŏ mjing Đảng Cộng sản Việt Nam leh anăn klei đru mguôp mơ̆ng dŭm gưl ênuk, gưl phung mniê mnuih djuê ƀiă čar Dak Lak. Đa đa phung mniê đảng viên êdah êdi hlăm dŭm bruă mjĕ êrô, kah mbha kơ bruă mđĭ lar bruă klam ba anăp, bi hmô mơ̆ng phung đảng viên mniê hlăm klei hlue ngă leh anăn mtrŭt mjhar phung mniê, mnuih ƀuôn sang hlue ngă hdră êlan mơ̆ng Đảng, hdră bhiăn knŭk kna. Klei thâo hlăm bruă thâo ƀuh, hriăm mbŏ, hưn mthâo phung mniê êdah êdi kơ Đảng, đru mđĭ lar bruă klam phung mniê hlăm klei hgŭm mkŏ mjing Đảng, bruă sang čư̆ êa; mđĭ bruă klam phung đảng viên hlăm klei hriăm, hlue ngă knhuah mngač Hồ Chí Minh. Gưl anei, Anôk bruă mkŏ mjing ăt mđup brei mnga leh anăn mnơ̆ng, bi mni kơ 50 čô đảng viên êdah êdi, mâo lu klei đru mguôp hlăm dŭm bruă ti Dak Lak.