Hlăm klei bi kƀĭn, phung bi ala hmư̆ hyuă kjăp 6 mta hră mơar lehanăn dưi bi mklă mta phŭn, boh phŭn, dŭm klei mrâo hlăm Hdră mtrŭn, Asăp mtrŭn mơ̆ng Phŭn bruă kđi čar, mbĭt anăn, bi êlam dŭm mta phŭn hluê si dŭm mta bruă. Blŭ gĭt gai hlăm klei bi kƀĭn, Khua gĭt gai Đảng, Khua lăn čar Tô Lâm lač klă, jih 6 mta hră mơar klă leh hdră êlan, mta kñăm; klei bi klă jing mkŏ mjing hluê ngă leh anăn bruă klam pô djă akŏ.

Djăp mta hră mơar brei jing bruă klă klơ̆ng, mâo pô đua klam, dưi ksiêm dlăng hŏng boh tŭ dưn; knhal tuč brei ngă lăn čar ktang hĭn, Mnuih ƀuôn sang hdĭp jăk hĭn, klei đăo knang kjăp hĭn. Khua gĭt gai Đảng, Khua lăn čar lač klă, jih 6 mta hră mơar hrăm mbĭt kñăm mđĭ klei thâo gĭt gai, kiă kriê, ai ktang mơ̆ng Đảng; mkŏ mjing êpul knuă druh ba anăp, bi hmô, jhŏng đua klam; kriê dlăng kjăp; mkŏ wĭt wăl anôk đĭ kyar; ba bruă hiu čhưn ênguê jing boh kdrŭt đĭ kyar, mđĭ lar djăp ai dưi djuê ana. Khua gĭt gai Đảng, Khua lăn čar mñă, mtam leh Klei bi kƀĭn, dŭm gưl bruă Đảng, anôk bruă, alŭ wăl, khua gĭt gai brei bi mklă bruă klam phŭn; jao djŏ mnuih, djăp klei dưi, ai dưi; klă boh tŭ dưn, hnơ̆ng kčah, bruă klam.