Thŭn hriăm mrâo anei, Y Hiển Nhi, anak mniê ayŏng A Trang, ti ƀuôn KRam, să Rờ Kơi, čar Quảng Ngãi nao hriăm adŭ 1B Sang hră gưl sa-gưl dua să Rờ Kơi. Dua hruê kăm êgao, grăp hruê hruê ñu nao sang hră čiăng mưng hŏng wăl anôk mrâo. Dŭm hruê tal êlâo dôk bi kngăr, mâo nai mtô jih ai tiê ktrâo lač, Y Hiển Nhi ƀrư̆ ƀrư̆ mưng hŏng sang hră mrâo.

Ung mô̆ ayŏng A Trang, ngă pưk hma, jih hruê mlam dôk hlăm hma kyua anăn bruă atăt ba anak ăt jing sa klei rŭng răng mơh. Thŭn hriăm mrâo anei, ayŏng A Trang h'ĭt ai tiê hĭn êjai Sang hră gưl hriăm điêt - gưl hriăm dua să Rờ Kơi mkŏ mjing klei dôk đih đăm, hriăm hră mơar kyua anăn klei hriăm hră mơar, klei hdĭp mda leh anăn atăt ba anak  srăng găl ênưih hĭn:

“Ti anei mnuih ƀuôn sang nao mă bruă jih hruê dleh dlan, lu blư̆ yang hruê dơ̆ng amâo mâo mmông atăt ba anak. Tơdah dưi dôk ti sang hră jing găl ênưih kơ phung amĭ ama, kyuadah bruă ti anei jih jang ngă bruă jơ̆ng kngan, jih hruê nao mă bruă kbưi hŏng sang, amâo mâo dưi atăt ba ôh. Phung amĭ ama ăt mơak mơh tơdah phung hđeh nao sang hră mâo klei êđăp ênang, leh anăn ƀăng jang jăk siam. Knŭk kna đru kơ krĭng knông lăn msĕ snei, phung amĭ ama mơak êdi. ăt hmăng hmưi êdei anei phung anak čô amâo mâo bi kdơ̆ng ôh, brei hriăm thâo sĭt”.

Thŭn hriăm 2026-2027, Sang hră čiêm rông hđeh mnuih djuê ana ƀiă gưl sa - gưl dua să Rờ Kơi mâo 1.156 čô hđeh, dưi mkŏ dăp 34 adŭ, mâo 20 adŭ gưl sa leh anăn 14 adŭ gưl dua. Dŭm hdră kơ klei huă ƀơ̆ng, klei dôk dơ̆ng ƀơ̆ng huă, klei êđăp ênang, klei gang mkhư̆, mdrơ̆ng hŏng klei pui ƀơ̆ng leh anăn klei doh êƀăt mnơ̆ng ƀơ̆ng dưi mprăp mơ̆ng hnưm. Sang hră ăt mkŏ mjing klei hriăm mjuăt kơ phung knuă druh, nai mtô, mnuih mă bruă kơ klei kriê dlăng, kriê dlăng hđeh sang hră dôk hlăm sang hră, dôk ti sang hră.

Sang hră Knŭk kna rông ba mlir gưl hriăm gưl sa-gưl dua să Mô Rai hlăk dôk hlăm wưng bi leh, ka dưi ba yua ôh hlăm wưng pŏk thŭn hriăm mrâo. Alŭ wăl iêu mthưr jih bruă kđi čar leh anăn dŭm êpul kahan, Lĭng kahan răng mgang knông lăn leh anăn Knơ̆ng bruă 78, Binh đoàn 15, đru bi leh dŭm bruă adôk. Grăp hruê mâo hlăm brô 30 čô mă bruă nao bi mdoh, đru kơ dŭm bruă čiăng mđĭ pral hnơ̆ng ngă bruă.

Kyua sang hră mrâo ka dưi ba yua mtam, hđeh sang hră gưl sa leh anăn gưl dua ăt hriăm ti anôk hriăm hđăp, rơ̆ng hdră kčah thŭn hriăm. Dŭm adŭ tal êlâo dưi mkŏ mjing drông hđeh sang hră hnưm hluê si klei kčah mtrŭn. Trương Công Chính, Khua bruă Đảng să Mô Rai brei thâo, truh kơ ară anei, êpul knuă druh kriê dlăng leh anăn nai mtô sang hră dưi bi kluôm.

Hlăm wưng tal 1, čar Quảng Ngãi bi leh 4 sang hră knŭk kna rông ba mlir gưl ti dŭm să Dục Nông, Sa Loong, Rờ Kơi leh anăn Mô Rai hlăm hruê 5/9/2026. Anôk bruă mtô bi hriăm čar Quảng Ngãi bi hgŭm hŏng dŭm alŭ wăl ksiêm dlăng, dăp êpul knuă druh kriê dlăng, nai mtô, mnuih mă bruă; bi leh hdră hrŏng ruah, mkŏ mjing klei mtô bi hriăm, dăp anôk huă ƀơ̆ng leh anăn kriê dlăng phung hđeh. Dŭm kdrăp mtô bi hriăm, sang pui, sang dlăng hră, adŭ bruă nah gŭ… mprăp ngă bruă hơĭt kjăp mơ̆ng akŏ thŭn hriăm.

Nguyễn Ngọc Thái, Khua Knơ̆ng bruă sang hră mtô bi hriăm čar Quảng Ngãi brei thâo, čar mâo 9 sang hră mâo Gưl dlông duh bi liê, mâo 4 sang hră hlăm wưng tal 1 leh anăn 5 sang hră hlăm wưng tal 2, ênoh prăk duh bi liê giăm 2.000 êklai prăk:

"Anei jing hdră êlan djŏ êdi leh anăn jing djŏ guôp, amâo djŏ knŏng pioh kơ klei hriăm hră mơar ƀiădah lŏ djŏ tuôm hŏng bruă răng mgang klei êđăp ênang, răng mgang lăn čar, răng mgang knông lăn. Knơ̆ng bruă sang hră mtô bi hriăm čar Quảng Ngãi đru kčĕ leh kơ knơ̆ng bruă sang čư̆ êa čar Quảng Ngãi iêu mthưr jih jang êpul êya, mđĭ êpul, gĭr ngă dŭm hdră lŏ ksiêm wĭt dŭm hdră êlan ngă hră mơar leh anăn ba hlăm klei bi hriăm thŭn hriăm mrâo djŏ hŏng hdră êlan mơ̆ng čar".

Mơ̆ng Rờ Kơi truh kơ Mô Rai, Sa Loong, Dục Nông, čar Quảng Ngãi, dŭm boh sang hră mrâo ƀrư̆ ƀrư̆ mâo hlăm krĭng knông lăn, ba hriê klei hơ̆k mơak leh anăn klei čang hmăng mơ̆ng phung hđeh, amĭ ama leh anăn nai mtô. Tơdah phung hđeh dưi hriăm hră djăp ênŭm, mnuih ƀuôn sang hơĭt ai tiê dôk ti ƀuôn, mđĭ kyar bruă duh mkra, răng mgang krĭng knông lăn mơ̆ng Ala čar./.