Tlam anei 11/5, ti Anôk bruă bi kƀĭn ala čar Mỹ Đình, Hà Nội mkŏ mjing leh Klei bi kƀĭn mkăp mơ̆ng phung bi ala Anôk bruă mặt trận Việt Nam kluôm ala tal XI, wưng thŭn 2026 – 2030. Hŏng akŏ “Hgŭm mguôp – Ngă phŭn mil pô – Mlih mrâo – Mĭn mrâo – Đĭ kyar”, Klei bi kƀĭn mkŏ mjing mơ̆ng hruê 11 – 13/5, jing hdră kđi čar – ala ƀuôn yuôm bhăn, mphŭn pŏk kơ wưng mrâo mơ̆ng Anôk bruă mặt trận hlăk dŭm êpul bruă kđi čar – ala ƀuôn lehanăn dŭm êpul êya mâo Đảng, Knŭk kna jao bruă klam mŭt hlăm Anôk bruă mặt trận Việt Nam.

Nao ti anôk bi kƀĭn mâo êbeh 1.300 čô bi ala, hlăm anăn mâo 1.138 čô bi ala klă klơ̆ng mâo Khua hlăm Dhar bruă mặt trận čar kwar gưl dlông Việt Nam tal X dôk păn bruă, bi ala mơ̆ng Mặt trận čar kwar dŭm čar, ƀuôn prŏng lehanăn dŭm êpul bruă hgŭm, mnuih Việt Nam dôk ti ala tač êngao lehanăn knuă druh thơ̆ng kơ bruă Mặt trận. Hưn mdah bruă kđi čar ti Klei bi kƀĭn mâo akŏ “Mđĭ bruă đua klam kđi čar phŭn mơ̆ng Anôk bruă mặt trận Việt Nam hlăm bruă mđĭ lar klei ngă phŭn mil pô, knhuah gru khăp kơ ala čar, ai ktang bi hgŭm mguôp djuê ana, mkŏ mkra ala čar đĭ kyar sah mdrŏng, yâo mơak, kreh dhar”. Ti anôk bi kƀĭn mkăp tlam anei, Klei bi kƀĭn mkŏ mjing leh hdră ruah Êpul phung khua kiă kriê, Êpul dlăng bruă; bi mklă hdră bruă, klei bhiăn mă bruă; hưn mthâo phung bi ala nao ti Klei bi kƀĭn; ksiêm dlăng hdră mă bruă mơ̆ng Dhar bruă gưl dlông, Êpul phung khua kiă kriê lehanăn Dhar bruă Mặt trận čar kwar gưl dlông Việt Nam wưng thŭn 2024 – 2026; ksiêm dlăng Hră mkra mlih, thiăm mbŏ dŭm mta hlăm Klei bhiăn bruă mặt trận čar kwar gưl dlông Việt Nam./.