Phung bi ala mđing bi trông, brei klei blŭ kơ 17 hdră bhiăn yuôm bhăn, mĭn tĭng ba mdah kơ bruă kƀĭn ala ti Klei bi kƀĭn tal dua, bruă kƀĭn ala gưl XVI. Blŭ hrăm mphŭn pŏk, Khua bruă kƀĭn ala Trần Thanh Mẫn mñă klă klei čiăng mđĭ hnơ̆ng jăk bruă čih mkra hdră bhiăn, mphŭn mơ̆ng hnơ̆ng jăk hdră êlan, amâo dôk tui tiŏ ênoh mta mtrŭn. Dŭm klei čih mkra hdră bhiăn brei msir mghaih dŭm boh klei mâo sĭt, ruh mtlaih klei gun kpăk, bi hluh ai dưi, răng mgang klei dưi leh anăn boh tŭ dưn djŏ hdră bhiăn mơ̆ng mnuih ƀuôn sang, anôk bruă duh mkra.

Khua bruă kƀĭn ala mtă amâo bi mlih ôh dŭm boh klei dleh, djŏ tuôm kơ klei dưi anak mnuih, klei dưi mnuih ƀuôn sang, klei găl bruă duh mkra mnia mblei, bi mbha ai dưi lehanăn mkŏ mjing klei dưi trŭn kơ hdră mtrŭn, hră mtrŭn. Mbĭt anăn, bruă čih mkra hdră bhiăn brei rơ̆ng kơ klei hrăm mbĭt plah wah dŭm hdră bhiăn, djŏ guôp hŏng gru hmô bruă knŭk kna alŭ wăl dua gưl, mtrŭt mđĭ klei mbha gưl, mbha klei dưi, čiăng kơ dŭm klei čuăn tơdah ba mdah dưi pŏk ngă tŭ dưn hlăm boh sĭt.