Khua gĭt gai Đảng, Khua lăn čar mñă klă, bruă klei mĭn brei mphŭn mơ̆ng boh sĭt, hlăm anăn klei hâo hưn kơ klei hdĭp yang ƀuôn brei truh kơ anôk mâo klei dưi bi mklă leh anăn mtrŭt mđĭ msir mgaih boh klei. Brei mkŏ mjing hdră mơ̆ng mđing hmư̆, ksiêm dlăng, bi mklă, ba djŏ anôk bruă truh kơ msir mgaih, wĭt lač leh anăn ksiêm dlăng boh tŭ; hưn mthâo kơ klei mĭn, ai tiê yang ƀuôn brei nao hlăm hdră bi mklă.

Khua gĭt gai Đảng, Khua lăn čar mtă brei ba klei mđing hmư̆ leh anăn mblang hlăm jih hdră mkŏ mjing, ba mdah leh anăn hluê ngă hdră mtrŭn; hâo hưn hdră mtrŭn brei mâo klei sĭt, klei hâo hưn djŏ, hưn mdah wăt klei găl, klei dleh dlan leh anăn klei hmăi. Anôk bruă mkŏ mjing hdră bhiăn brei đua klam kơ hnơ̆ng tŭ jăk hdră bhiăn, mkŏ mjing hluê ngă, mbĭt anăn čŏng hâo hưn, mblang leh anăn tŭ mă klei wĭt lač. Khua gĭt gai Đảng, Khua lăn čar ăt mtă kơ dŭm anôk bruă klei mrâo phŭn mđĭ hĭn klei thâo ksiêm dlăng, mblang, ƀuh boh klei leh anăn mđĭ hĭn klei nao hgŭm mnuih ƀuôn sang, boh nik phung mda asei.