Anei jing klei bi kƀĭn knhal tuč mprăp kơ Klei bi kƀĭn tal dua, Bruă kƀĭn ala gưl XVI, mĭn tĭng bi mklă 38 hdră bhiăn leh anăn lu hdră mtrŭn yuôm bhăn, hlăm anăn mâo hlăm brô 7 hdră mtrŭn hdră bhiăn. Khua bruă kƀĭn ala Trần Thanh Mẫn mtă kơ dŭm anôk bruă čih mkra, ksiêm dlăng lŏ dơ̆ng mlih mrâo klei mĭn, hdră ngă, mđĭ hnơ̆ng tŭ jăk dŭm mta phŭn hưn mdah hŏng Bruă kƀĭn ala; mđing bi klă dŭm boh klei phŭn, mdưm hnơ̆ng tŭ jăk, klei dưi leh anăn klei čiăng mđĭ kyar jing tal êlâo.

Hlăm anăn, hdră bhiăn lăn ala (lŏ mlih mrâo) leh anăn hdră bhiăn ba mdah hră mơar hdră bhiăn mâo boh tŭ yuôm bhăn. Khua bruă kƀĭn ala mñă, hdră bhiăn lăn ala djŏ tuôm kơ jih jang bruă duh mkra leh anăn klei hdĭp mnuih ƀuôn sang, mâo lu mnuih ƀuôn sang, anôk bruă duh mkra mđing dlăng, kyuanăn brei ngă kjăp, ngă bi jăk. Dhar bruă gĭt gai bruă kƀĭn ala ăt brei klei blŭ kơ hdră bhiăn lăn ala (lŏ mlih mrâo), hlăm anăn mđing kơ hdră êlan mă bruă, ba yua lăn leh anăn bi klă ênoh lăn hluê hdră hưn mdah, klă mngač, kpă mngač, bi knar klei tŭ dưn plah wah knŭk kna, mnuih yua lăn leh anăn phung duh bi liê.