Thŭn hriăm 2026-2027, Dak Lak lŏ dơ̆ng mkŏ dăp anôk bruă sang hră mơar, adôk 625 anôk bruă, hrŏ êbeh mkrah mkă hŏng thŭn hriăm êlâo. Ƀiădah, klei kƀah nai mtô, adŭ hriăm, adŭ bruă leh anăn kdrăp mtô bi hriăm, klei hluê ngă bruă sang hră mtô bi hriăm yang ƀuôn ăt jing boh klei prŏng. Čiăng msir mghaih, Anôk bruă sang hră mtô bi hriăm Dak Lak ba mdah thiăm êbeh 6.700 hnơ̆ng čuăn knuă druh nai mtô wưng thŭn 2026-2030.

Anôk bruă ăt mdưm mta kñăm "Mlih mrâo klei mĭn - Mlih mrâo ktang phĭt - Boh tŭ klă sĭt", hluê ngă klei bhiăn "bi hrŏ čiăng mđĭ", lăm lui hră mơar mtŭk mtŭl, bi hrŏ ƀiă êdi 50% klei bi lông, hdră bruă ngă mang; mbĭt anăn mđing msir mghaih klei êbeh, kƀah nai mtô leh anăn mtrŭt mđĭ hdră mlih mrô kluôm dhuôm. Bruă sang hră mtô bi hriăm Dak Lak brei bi mlih ktang mơ̆ng klei mlih mrâo hdră êlan jing mjing dŭm boh tŭ dưn klă klơ̆ng, hlăm anăn mta phŭn mă hnơ̆ng tŭ jăk klă sĭt leh anăn klei đĭ kyar mơ̆ng phung hđeh sang hră jing hnơ̆ng mkă.