Hruê mbruê 7/10, Anôk bruă gĭt gai tui duah, hrui m ƀĭn le hanăn bi mklă klang kleh phung kahan djiê êngiă čar Quảng Ngãi mkŏ mjing hdră dŭ mdiăng, ba jao êbeh 2.200 mta klang kleh phung kahan djiê êngiă gưl tal 4 kơ Anôk bruă ksiêm dlăng klang kleh lĭng kahan čiăng bi mklă ADN, mkăp kơ bruă bi mklă klang kleh phung kahan djiê êngiă. Êlâo kơ knăm ba jao, phung bi ala myơr mnga, čuh brui mngưi, pioh mnĭt bi hdơr, bi êdah klei hdơr knga kơ phung săn leh asei kyua klei êngiê, hnŭk êngiê mơ̆ng Ala čar. Dŭm mta dưi ksiêm dlăng, bi mklă hră mơar, čih anăn lehanăn kriê pioh hluê djŏ hdră.

Hlăm êbeh 2 mlan hŏng anei, dŭm êpul mă mta ksiêm mkă mơ̆ng čar Quảng Ngãi mâo mă leh êbeh 13.500 kdrêč msat ti dŭm êtuh anôk msat lĭng kahan djiê êngiă, hrui mă êbeh 9.000 mta djăp hnơ̆ng čuăn ksiêm mkă.

Truh kơ ară anei, čar ba jao leh êbeh 6.800 mta kơ Anôk bruă ksiêm mkă klang kleh lĭng kahan čiăng bi mklă ADN, đru bi klă anăn phung lĭng kahan djiê êngiă adôk kƀah klei hâo hưn.