Sang hră hđeh điêt Krông Bông, să Krông Bông, čar Dak Lak leh bi mŭt mbĭt mâo 1 anôk phŭn, 2 anôk mkăn leh anăn 3 anôk sang hră điêt hŏng 515 čô hđeh. Bruă krơ̆ng phung hđeh, nai mtô ti dŭm anôk hriăm hđăp đru bi hrŏ klei rŭng răng, ƀiădah lŏ dơ̆ng mdưm bruă kriê dlăng sa sang hră hlăm sa alŭ wăl prŏng, hđeh bi ktlah. Lê Thị Thuý Nga, Khua sang hră hâo hưn:

“Sang huă ƀơ̆ng ti anôk mtô bi hriăm Măng Non jing mkăp brei mnơ̆ng ƀơ̆ng huă kơ 2 anôk hriăm, snăn jing srăng mâo klei dŭ mdiăng mnơ̆ng ƀơ̆ng huă truh kơ sa anôk hriăm điêt mkăn. Anôk bruă Họa Mi snăn sa sang huă ƀơ̆ng srăng mkăp brei mnơ̆ng ƀơ̆ng huă kơ sa anôk bruă leh anăn 2 anôk hriăm điêt mkăn, snăn jing ăt tuôm hŏng klei dleh dlan hlăm bruă jing dŭ mdiăng mnơ̆ng ƀơ̆ng huă kơ phung hđeh mơ̆ng ênoh prăk mơ̆ng yang ƀuôn mơ̆ng phung amĭ ama."

Tơdah sa sang hră leh mkŏ dăp mâo lu anôk hriăm, klei čiăng kriê dlăng, mkŏ mjing hdră mtô bi hriăm amâo dưi knŏng tĭng hluê hnơ̆ng prŏng mơ̆ng sang hră phŭn ôh. Ti Sang hră gưl sa Nguyễn Du, ƀuôn hgŭm Tân Lập, čar Dak Lak, klei čiăng mkŏ dăp phung truăn kơ bruă Đội ti dŭm anôk hriăm jing sa klei bi hmô. Nguyễn Thị Hương, khua sang hră brei thâo ară anei brei phung nai klam bruă:

"Klei prŏng hĭn mơ̆ng dŭm sang hră ară anei dôk tuôm anăn jing kƀah sa čô khua kiă kriê truăn kơ bruă čiăng duh kơ klei ngă bruă mơ̆ng sang hră ti lu snăk anôk sang hră dôk čiăng jing brei mâo klei thâo, klei kreh knhâo. Snăn ară anei jing dŭm sang hră dôk msĕ si bi mguôp, jing mă mơ̆ng nai mtô klei hriăm anei amâodah nai mtô gưl hđeh điêt pioh ngă. Sĭt yơh čiăng mâo sa čô nai kiă kriê jih jang bruă snăn ka mâo ôh. Wăt kơ nai mtô klei mmuñ  ngă ară anei ka dưi djăp ôh bruă anăn".

Leh mkŏ dăp dua gưl hriăm gưl sa leh anăn gưl dua, Sang hră gưl sa - gưl dua Quang Trung, să Krông Bông, čar Dak Lak djăp leh adŭ hriăm kơ 19 adŭ ƀiădah kƀah lu adŭ ngă bruă, adŭ hriăm mjuăt. Nguyễn Viết Bá Hoàng, khua kiă kriê sang hră brei thâo, wăt tơdah sang hră dưi jao thiăm anôk bruă mơ̆ng dŭm anôk bruă hđăp čiăng pŏk mlar wăl anôk,ƀiădah amâo dưi djăp ôh klei čiăng.

“Jih jang adŭ mă bruă mơ̆ng knơ̆ng bruă sang čư̆ êa să ară anei hmei knŏng ba yua ngă dŭm adŭ bruă amâodah adŭ ngă hră mơar đuič. Tơdah brei prăk kăk amâodah hdră êlan si ngă čiăng kơ hmei lăm lui mă wĭt anôk ala čiăng duh bi liê lŏ dơ̆ng. Bi ară anei tơdah amâo mâo ôh ênhă mơ̆ng anôk bruă sang čư̆ êa să hđăp snăn hmei amâo dưi ngă ôh. Ară anei hmei amâo mâo ôh sa anôk mtô mjuăt asei mlei hjăn ôh.”

Mbĭt hŏng dŭm boh klei mâo hlăm wưng sui, hdră bi mlih jing gru hmô mrâo lŏ mâo dŭm klei kpăk hlăm bruă knŭk kna ti anăp. Dŭm boh sang hră brei hluê ngă dŭm klei ngă hră mơar djŏ tuôm kơ mrô jia, mrô bi mklă anôk bruă leh anăn gru kđăm. Bruă êmưt bi leh dŭm klei ngă hră mơar anei dưi hmăi klă anăp kơ klei bi mnia mblei, ngăn prăk leh anăn bruă ngă mơ̆ng sang hră.  Bùi Lan Anh - Khua sang hră gưl dua Nguyễn Chí Thanh, ƀuôn hgŭm Tân Lập lač kơ boh sĭt:

“Sang hră hmei jing Trần Bình Trọng bi mŭt mbĭt hŏng Nguyễn Chí Thanh jing Sang hră Nguyễn Chí Thanh. Sa anôk bruă mrâo mkŏ mjing snăn jing brei mâo mrô knăl prăk jia mrâo leh anăn mrô knăl anôk bruă mrâo. Kahan ksiêm ăt mtă jing msĕ snăn, jih dua anôk bruă hđăp brei bi mŭt mrô knăl prăk jia leh anăn lŏ ngă mrô knăl mrâo snăn Kahan ksiêm kơh brei hmei ngă mrô knăl mrâo. Snăn truh kơ êbeh mkrah mlan hŏng anei hmei bi mŭt leh mrô knăl leh, ngă bruă jing amâo mâo klei dưi ôh hlăm wưng leh êgao”.

Dưi ƀuh, leh mkŏ dăp dŭm anôk bruă mtô bi hriăm klei kčah mtrŭn kơ anôk bruă mtô bi hriăm Dak Lak amâo djŏ knŏng jing dăp wĭt sang hră, ƀiădah brei tĭng djŏ ai dưi kơ grăp gru hmô sang hră, grăp anôk bi hriăm leh anăn anôk mtô bi hriăm; mbĭt anăn msir mghaih dŭm klei kƀah kơ mnuih mă bruă, adŭ bruă, kdrăp mnơ̆ng leh anăn anôk bruă nah gŭ mkăp kơ klei mtô bi hriăm. Bi hrŏ anôk bruă knŏng jing boh tŭ mơ̆ng hdră mkŏ dăp. Boh tŭ dưn klă sĭt mơ̆ng hdră anei srăng dưi bi êdah hlăm wưng kơ anăp, tơdah dŭm sang hră mrâo ngă bruă hơĭt kjăp, hnơ̆ng jăk bruă mtô bi hriăm dưi rơ̆ng leh anăn phung hđeh sang hră ti dŭm anôk mdê mdê dưi mâo klei găl dưi nao hgŭm hlăm dŭm klei găl mtô bi hriăm bi knar.