Ƀuôn hgŭm Lạc Dương, čar Lâm Đồng mâo mkŏ mjing leh klei bi mŭt mbĭt 3 să Đạ Sar, Đạ Nhim lehanăn Đạ Chais mơ̆ng kdriêk Lạc Dương hđăp. Anei jing ƀuôn hgŭm mâo boh prŏng hĭn hlăm čar, giăm 830km2, ênoh mnuih giăm 15.000 čô mnuih, jih jang jing mnuih djuê ana K’Ho sơăi. Ƀuôn hgŭm mâo 30 êpul bruă Đảng, hŏng êbeh 500 čô đảng viên. Ya Tiong, Khua bruă Đảng ƀuôn hgŭm Lạc Dương, brei thâo, hlăm jih wưng dôk prăp êmiêt lehanăn brei bruă sang čư̆ êa mrâo mă bruă mơ̆ng hrue 1/7, ƀuôn hgŭm mâo mđing leh êdi kơ klei bi mguôp hlăm phung knuă druh lehanăn mnuih ƀuôn sang:

“Êlâo hĭn hlăm êpul bruă brei mâo klei bi sa ai, thâo bi mguôp, anăn yơh jing klei tal êlâo pioh dưi kiă kriê, lehanăn gĭt gai bruă knuă. Hlăm hrue 2/7 mtam hlŏng mkŏ mjing dŭm êpul bruă djŏ tuôm hlŏng truh kơ klei dưi hlăm gưl ƀuôn hgŭm. Mnuih ƀuôn sang tinei jing djuê ana tinăn truh 86%, lăn ala prŏng mnuih dôk raih rưng, hmei čŏng mơ̆ng phŭn mtam mtă kơ mnuih ƀuôn sang tinei brei thâo bi mguôp, bi sa ai”.

Leh klei bi mŭt mbĭt 3 boh čar Lâm Đồng, Đăk Nông lehanăn Bình Thuận, čar Lâm Đồng mrâo mâo ênŭm djăp mta pioh kơ klei mđĭ kyar pral, ba akŏ msĕ si bruă hiu čhưn ênguê dliê hŏng êa ksĭ Đà Lạt-Phan Thiết; hnơ̆ng mâo bauxite prŏng hĭn hlăm kluôm ala hlăm brô 5,4 êklai tôn; dŭm anôk mă êa pui êwa čuh hŏng hnơ̆ng prŏng mơh, hang ksĭ mâo boh taih 192 km…

Čiăng pral dưi kiă kriê, gĭt gai, dưn yua jih klei găl, klei dưi mơ̆ng sa alŭ wăl prŏng mơ̆ng dliê trŭn kơ êa ksĭ, čar Lâm Đồng bi klă leh bruă sang čư̆ êa 2 gưl mă bruă ênŭm jih jang, mâo klei tŭ dưn. Nguyễn Hồng Hải, K’iăng khua knơ̆ng bruă sang čư̆ êa čar  Lâm Đồng, brei thâo, klei anei knŏng dưi ngă tŭ jing tơdah mâo klei thâo bi mguôp  kjăp:

“Drei hlăk nao hlăm klei bi mlih hdră êlan mă bruă, kyuanăn ăt adôk mâo anôk ka ênŭm jih ôh. Snăn tal êlâo jing brei mâo klei thâo bi mguôp čiăng kơ drei dưi bi leh bruă čuăn mơ̆ng čar mrâo. Bi tơdah drei amâo mâo thâo bi mguôp ôh, snăn amâo mâo dưi bi leh bruă knuă ôh. Snăn brei drei thâo bi sa ai mđrăm mbĭt hlue ngă mtam jih jang bruă”.

Hlăm lu mta bruă mơ̆ng sa boh čar mrâo, dơ̆ng mơ̆ng bruă bi mŭt 3 boh čar mbĭt, thŭn anei čar Lâm Đồng mrâo gĭr ktĭr čiăng bi leh mta čuăn mđĭ kyar bruă dih mkra êbeh 8% lehanăn đĭ kyar truh dua mrô kơ dlông hlăm wưng tinăp. Čiăng dưi bi sĭt klei anăn, knuă druh lehanăn mnuih ƀuôn sang čar Lâm Đồng hlăk dôk yơr hla čhiăm gru klei bi mguôp prŏng msĕ si klei Khua gĭt gai Hồ Chí Minh mtô leh dưi mjing ai ktang hlăm bruă rŭ mdơ̆ng čar Lâm Đồng đĭ kyar pral lehanăn kjăp./.