Sa hlăm dŭm čô hđeh hriăm hră mâo boh tŭ dưn hlăm klei bi lông jih gưl 3 thŭn anei, adei Bùi Thanh Lâm – hđeh hriăm hră gưl 3 sang hră truăn Hùng Vương, dôk ti ƀuôn hgŭm Diên Hồng, čar Gia Lai. Lâm jing sa hlăm ƀiă phung hđeh hlăm čar mâo mă puăng 10 klei hriăm Angle. Lač kơ boh tŭ dưn anăn, Lâm bi êdah klei mơak, lehanăn klei kngăr. Hưn kơ klei hriăm hră mơar, ñu mñă klei yuôm bhăn jing păn kjăp jih  klei thâo săng kơ ngữ pháp lehanăn từ vựng hlăm lu thŭn êgao. Boh nik ñu lŏ čŏng nao mđrĭn hŏng dŭm hdră hriăm knhêč, msĕ si tui ksiêm hriăm mơ̆ng YouTube hŏng klei Angle mtam truăn kơ klei kreh knhâo čiăng êmăt hlăm klei mđing hmư̆, lehanăn lŏ bi lu từ vựng hĭn. Hŏng đĭgn blŭ, Lâm lač:

“čiăng thâo kơ klei pô hriăm ênưih thâo, ya mta pruê jing ênưih lehanăn ya mta boh blŭ jing dleh ƀuh nik mtam. Kâo čiăng mâo mă puăng 10 snăn jing bi kjăp hdră hriăm mơ̆ng mphŭn mtam, hlŏng kơ ară anei mjuăt nanao mơ̆ng từ vựng bi kjăp; tơdah leh êmăt hlăm ngữ pháp lehanăn păn kjăp jih jang hdră êlan hriăm snăn dơ̆ng h’ĭt leh. Kâo kreh tui dlăng hlăm YouTube mâo lu từ vựng, blŭ ênưih msĕ si Bsport, hay Mini Earth lehanăn lu êlan mkăn”.

Adei Bành Gia Huân, hđeh hriăm hră sang hră truăn Lê Quý Đôn (Quy Nhơn) jing sa hlăm dŭm čô hđeh êdah êdi hŏng dua puăng 10 hŏng klei hriăm Angle lehanăn  Vật lý. Klei tŭ dưn anei amâo mâo djŏ jing klei myưng m’ang kơ hjăn asei ñu pô ôh, ƀiădah lŏ jing klei mơak mbĭt hŏng sang hră lehanăn gŏ sang. Čiăng dưi mâo boh tŭ dưn anăn, Bành Gia Huân mâo leh sa hdră hriăm mjuăt kjăp, hriăm hlăm klei kreh knhâo. Hŏng klei hriăm Vật lý, klei thâo khăp kơ klei kreh knhâo đru leh kơ Huân čŏng hriăm klei hriăm anei hŏng klei jăk. Ñu kreh mkra nanao klei hriăm dleh, lŏ ksiêm duah êlam hĭn hlăm klei čih lehanăn klei lông ngă čiăgn kơ klei lông ngă hlăm klei bi lông pioh bi kjăp klei thâo săng, lehanăn bi mưng hlăm klei nao bi lông. Hŏng klei hriăm Angle, khădah ƀuh ti anei jing msĕ si bi kngăr hĕ ƀ’ƀiă kơ ênoh puăng mâo, ƀiădah kâo mâo klei hơĭt ênang ai tiê kyuadah anei jing klei hriăm kâo khăp:

“Kâo mâo hĕ klei bi kngăr kyuadah klei hriăm Angle mâo leh dŭm akŏ klei bi lông, lehanăn lông ngă ƀuh jing čiăng. Ti sang hră hriăm hlăm adŭ truăn kơ klei Angle leh, ăt dôk hlăm êpul pioh nao bi lông gưl lăn čar, mơ̆ng anăn mơh mâo klei hriăm mjuăt nanao. Bi dôk ti sang, kâo kreh pŏk video hŏng klei Angle čiăng hlăp êjai lehanăn hriăm êjai”.

  Nguyễn Thị Bé, amĭ Bành Gia Huân, amâo mâo mdăp ôh klei mơak. Ñu lač, gŏ sang jing nanao anôk kăp mđĭ ai prŏng snăn, mjing klei găl kơ Huân ktuh êyuh hlăm klei hriăm. Hŏng atur kjăp leh mâo, lehanăn hdră êlan tinăp leh tă. Huân hlăk mprăp kơ klei mŭt hriăm gưl prŏng, lehanăn tui tiŏ klei pô čiăng.

“Klei kâo čang hmăng jing mâo mŭt hriăm sang hră gưl prŏng Bách khoa ƀuôn prŏng Hồ Chí Minh, hriăm kơ Khoa học Công Nghệ snăn mâo gŏ sang mđĭ ai, anăn jing bruă phŭn hriăm jing dleh snăk, sĭt nik brei mâo keli gĭr yơh čiăng dưi hmao hlăm klei hriăm.”

Hlăm ênoh 327 čô hđeh hriăm hră ti Gia Lai mâo mă puăng 10 ti anôk bi lông jih gưl 3 thŭn 2025 lu hlăm jih jang klei hriăm dôk hlăm êpul hriăm jing Khoa học xã hội lehanăn Khoa học tự nhiên. Klei anei brei ƀuh klei bi knar hlăm hnơ̆ng mjuăt bi hriăm, lehanăn klei thâo mơ̆ng phung hđeh hlăm čar./.