Grăp aguah knăm 4,  Anôk bruă ngă hră mơar knŭk kna ƀuôn hgŭm Hàm Tân lŏ jing anôk bi tuôm plah wah bruă sang čư̆ êa leh anăn mnuih ƀuôn sang. Mbĭt hŏng jhưng tŭ mă hră mơar, dŭm kčok čê, êa, kphê dưi mprăp leh čiăng iêô mthưr kơ mnuih mnuih ƀuôn sang êjai dôk guôn ngă hră mơar amâodah blŭ hrăm hŏng khua gĭt gai să. Leh pŏk ngă gru hmô bruă knŭk kna alŭ wăl dua gưl, să krơ̆ng kjăp gru hmô "Mđing hmư̆ lehanăn blŭ hrăm hŏng mnuih ƀuôn sang", mjing wăl anôk pŏk mlar čiăng kơ mnuih buôn sang klă anăp hưn mdah dŭm klei dleh dlan, gun kpăk leh anăn dưi mđĭng hmư̆, wĭt lač tinăn mtam. Trần Quang Thanh, mnuih ƀuôn sang să Hàm Tân, c̆ar Lâm Đồng lac̆:

"Dŭm klei ngă hră mơar djŏ tuôm hŏng lăn čuah jing mtŭk mtŭl êdi, ƀiădah kyua knăm 4 drông mnuih ƀuôn sang, mâo khua gĭt gai tinăn ktrâo lač leh kơ hmei hluê ngă dŭm knhuang čiăng ngă bi kluôm ênŭm, pral kdal".

Knăm 4 bi blŭ hrăm ti ƀuôn hgŭm Hàm Tân, čar Lâm Đồng, ară anei jing leh anôk mnuih ƀuôn sang hưn mdah lu mta klei, mơ̆ng hră mơar lăn ala, êlan klông, klei hdĭp mda ala ƀuôn truh kơ klei gun kpăk hlăm bruă ngă hră mơar knŭk kna. Klei dưi čih yap amâo djŏ knŏng klei akâo mơ̆ng phung knuă druh să, bruă čih yap klei blŭ dưi hluê ngă kjăp ƀiădah dŭm klei wĭt lač mơ̆ng să ăt dưi mâo klei klă mngač.

Truh ară anei, Knơ̆ng bruă sang čư̆ êa să Hàm Tân mđĭ lar 16 blư̆ bi trông, čih yap êbeh 523 gưl klei blŭ, klei akâo, kah knar hlăm brô 20 klei blŭ hlăm sa blư̆. Mơ̆ng dŭm klei hưn lač kơ hră mơar knŭk kna, anôk bruă êlan klông, lăn ala truh kơ dŭm bruă mnuih ƀuôn sang dôk, jih jang mâo phung khua să klă anăp mđing hmư̆, mbha mta msir mghaih amâodah jao kơ anôk thơ̆ng kơ bruă mkŏ mjing hdră êlan mgaih msir. Hlue si Nguyễn Thành Nam, K’iăng khua bruă Đảng, Khua anôk bruă sang čư̆ êa să Hàm Tân, anei amâo djŏ knŏng jing klei bi tuôm grăp wưng, ƀiădah jing klei ƀuăn rơ̆ng "blŭ nao mbĭt hŏng mă bruă", đru kơ mnuih ƀuôn sang ƀuh klei blŭ mơ̆ng pô dưi mâo klei mpŭ leh anăn dưi msir mghaih.

"Đru kơ mnuih ƀuôn sang ngă dŭm hră mơar knŭk kna leh anăn dôk bi blŭ hrăm hŏng mnuih buôn sang čiăng mđing hmư̆ dŭm klei čiăng, klei hmăng hmưi, klei dleh dlan, klei gun kpăk kpăk êjai diñu truh hŏng bruă sang čư̆ êa. Mbĭt anăn, hmei ăt tŭ mă nanao, msir mgaih dŭm klei blŭ mguôp čiăng mkŏ mjing bruă knŭk kna ƀrư̆ hruê ƀrư̆ jăk hĭn. Bi hŏng Anôk bruă ngă hră mơar Knŭk kna, hmei gĭr ktưn jih ai tiê čiăng ngă bruă hŏng klei jăk kơ mnuih ƀuôn sang tơdah nao ngă hră mơar knŭk kna”.

Sa thŭn amâo djŏ jing wưng sui ôh, ƀiădah djăp čiăng ƀuh klei bi mlih hlăm klei mĭn mă bruă mơ̆ng bruă sang čư̆ êa alŭ wăl dua gưl. Êjai knŭk kna nao truh kơ mnuih ƀuôn sang, mđing hmư̆ leh anăn mghaih msir dŭm boh klei mơ̆ng nah gŭ, snăn hnơ̆ng mkă kơ klei bi mlih bruă ngă hră mơar amâo mâo djŏ knŏng jing klei tŭ dưn bruă knuă ôh ƀiădah lŏ jing klei đăo knang leh anăn klei mnuih ƀuôn sang sa ai./.