Leh mnơ̆ng dhơ̆ng măk ka mơ̆ng Knơ̆ng bruă mnơ̆ng dhơ̆ng lŏ hma Lăn hrah Bazan (alŭ 4, să Nhân Cơ, čar Lâm Đồng) mâo yap jing mnơ̆ng dhơ̆ng OCOP 3 mtŭ thŭn 2024, anôk bruă duh mkra jhŏng pŏk mlar hnơ̆ng mkra mjing. Amâo djŏ knŏng mđĭ hrui blei asăr măk ka mtah mnuih ƀuôn sang ôh, knơ̆ng bruă lŏ bi liê hdră mkra mjing, ƀhu krô leh anăn mkra mjing čiăng mđĭ ênoh yuôm mnơ̆ng dhơ̆ng. Thŭn anei, hnơ̆ng măk ka leh mkra mjing mĭn tĭng mâo hlăm brô 100 ton, đĭ lu hĭn mkă hŏng wưng êlâo. Khădah snăn, mbĭt hŏng mnơ̆ng dhơ̆ng đĭ pral jing klei kpĭ duah anôk ba čhĭ hơĭt kjăp. Thân Thị Thảo, Khua anôk bruă duh mkra brei thâo, mnia blei điện tử jing êlan nao mâo lu klei găl ƀiădah anôk bruă duh mkra brei mâo klei đru čiăng ba yua tŭ dưn.

Thŭn anei hnơ̆ng măk ka đĭ êbeh 2-3 blư̆, anôk ba čhĭ lu jing hmei ăt čhĭ hlue si klei mưng mơ̆ng phung bi kral, Facebook, Zalo. Čiăng čhĭ hlăm anôk mnia blei điện tử ƀiădah ka mâo klei thâo kơ klei đŭng hruh, anôk msir mgaih mnơ̆ng dhơ̆ng čiăng dưi đru."”

Mơ̆ng boh sĭt klei čiăng ksiêm dlăng anôk ba čhĭ kơ mnơ̆ng dhơ̆ng lŏ hma, akŏ thŭn anei, să Nhân Cơ ba yua Anôk bruă mnia blei điện tử ti anôk bruă Đảng să, hŏng website nhanco.vn msĕ si  "sang mnia mrô"”ti alŭ wăl. Tinei, dŭm  phung dưi đru mkŏ mjing rup, ba mnơ̆ng dhơ̆ng hlăm anôk ba čhĭ, bi mklă phŭn agha, hưn mdah, čhĭ mnơ̆ng dhơ̆ng leh anăn mkŏ dŭ mdiăng. Kyua anăn, phung mkra mjing  grăp knhuang bi mlih mơ̆ng klei mưng dôk guôn phung hiu blei jing bi tuôm hŏng phung duah blei leh anăn mkŏ mjing anăn knăl hlăm anôk mrô. Amai Phạm Thị Nga, anôk mkra mjing hruh čĭm iăt Thiên Ngọc Nga, ti alŭ 10, să Nhân Cơ brei thâo bruă hgŭm hlăm dŭm anôk mnia blei điện tử să pŏk thiăm klei găl bi tuôm hŏng phung blei mnơ̆ng êngao alŭ wăl.

“Mơ̆ng leh hgŭm hlăm anôk mnia blei điện tử ti să, mnơ̆ng dhơ̆ng hruh čĭm iăt mâo lu mnuih thâo hĭn, phung blei ti lu anôk hriê lu hĭn. Kâo čang hmăng wưng kơ anăp amâo djŏ knŏng hruh čĭm iăt ôh ƀiădah wăt măk ka, kphê leh anăn lu mnơ̆ng dhơ̆ng mkăn mơ̆ng alŭ wăl srăng dưi hưn mdah lar ƀar hĭn, mđing kơ lu anôk ba čhĭ.”

Ară anei să Nhân Cơ mâo 8 mnơ̆ng dhơ̆ng OCOP leh anăn dôk nbi leh hră mơar ksiêm dlăng thiăm 4 mnơ̆ng dhơ̆ng mrâo. Kluôm să mâo 10 êpul hgŭm bruă ngă bruă hlăm bruă lŏ hma, hŏng ênoh prăk čih anăn êbeh 28,5 êklai prăk. Anei jing phŭn mnơ̆ng dhơ̆ng yuôm bhăn čiăng kơ alŭ wăl lŏ dơ̆ng mđĭ kyar mnia blei điện tử. Hlue si Vũ Trọng Tài,  K’iăng Khua adŭ bruă duh mkra – anôk bruă nah gŭ să Nhân Cơ,  leh giăm mkrah thŭn ngă bruă, klei năng mđing hĭn amâo djŏ knŏng jing ênoh mnơ̆ng dhơ̆ng dưi ba hlăm anôk ba čhĭ ôh ƀiădah jing klei bi mlih hlăm klei thâo săng phung mkra mjing.

"Mơ̆ng mlan 2/2026 truh ară anei, anôk mnia blei điện tử să ksiêm dlăng leh 12 mnơ̆ng dhơ̆ng mơ̆ng 8 pô ti alŭ wăl. Hmei mkŏ mjing êpul ngă bruă čiăng đru kơ mnuih ƀuôn sang ba mnơ̆ng dhơ̆ng hlăm anôk ba čhĭ, hưn mdah, msir mgaih hră akâo blei leh anăn lŏ dơ̆ng mđĭ website nhanco.vn čiăng kơ bruă mnia blei điện tử jing boh kdrŭt mđĭ kyar bruă duh mkra mơ̆ng alŭ wăl.”

 Anôk mnia blei điện tử ti să Nhân Cơ kyua anăn amâo djŏ knŏng jing anôk čih klei hâo hưn mnơ̆ng dhơ̆ng amâodah anôk kăp mă hră akâo blei ôh. Anei lŏ jing klei mkŏ plah wah anôk bruă duh mkra, êpul hgŭm bruă leh anăn gŏ êsei mkra mjing, anôk phung ngă lŏ hma kah mbha klei thâo, tui duah ƀĭng hgŭm leh anăn grăp knhuang mkŏ mjing hdră ngă mrâo hlăm klei mđĭ kyar anôk ba čhĭ. Phan Anh Tuấn, Khua dlăng bruă Đảng să Nhân Cơ brei thâo, boh tŭ prŏng hĭn mơ̆ng gru hmô amâo dôk hlăm ênoh hră akâo blei ară anei ôh ƀiădah hlăm bruă mkŏ mjing sa anôk mkŏ mkra mjing leh anăn ba čhĭ mơ̆ng nah gŭ mtam.

“Boh tŭ dưn tal êlâo amâo djŏ knŏng čhĭ mnơ̆ng dhơ̆ng ôh ƀiădah lŏ mjing wăl duh mkra, êpul hgŭm bruă bi tuôm, mkŏ, hưn mdah anăn knăl. Hmei čang hmăng ƀrư̆ hruê mâo lu mnơ̆ng dhơ̆ng mơ̆ng Nhân Cơ leh anăn dŭm alŭ wăl jĕ giăm dưi ba hlăm anôk ba čhĭ, čiăng kơ lu mnuih  thâo hĭn kơ mnơ̆ng dhơ̆ng jăk mơ̆ng krĭng lăn anei, klei găl mơ̆ng să ăt dưi mđĭ hnơ̆ng."

Mơ̆ng sa “sang mnia mrô “ mơ̆ng gưl să, Nhân Cơ dôk pŏk sa hdră ngă mrâo hlăm klei mđĭ kyar bruă lŏ hma leh anăn mkŏ mkra krĭng ƀuôn sang mrâo. Amâo djŏ knŏng đru kơ mnơ̆ng dhơ̆ng lŏ hma pŏk mlar anôk ba čhĭ ôh, gru hmô lŏ đru mguôp bi mlih klei mĭn mkra mjing, mnia blei mnuih ƀuôn sang leh anăn anôk bruă duh mkra, mbĭt anăn bi mklă bruă klam hrăm mbĭt mơ̆ng bruă sang čư̆ êa alŭ wăl nah gŭ hlăm klei mlih mrô. Anăn ăt jing klei bi mklă kơ bruă ba Hdră mtrŭn mrô 57-NQ/TW mơ̆ng Phŭn bruă kđi čar hlăm klei hdĭp hŏng bruă ngă klă klơ̆ng, grăp knhuang mjing tur knơ̆ng čiăng kơ bruă duh mkra mrô mkŏ mjing leh anăn mđĭ kyar mơ̆ng krĭng ƀuôn sang lăn hrah bazan Nhân Cơ, čar Lâm Đồng./.