Hưn mdah hlăm klei bi kƀĭn, hlăm 9 mlan thŭn 2026, ênoh prăk duh bi liê ala tač êngao čih yap ti Việt Nam mâo êbeh 50 êklai USD, đĭ êbeh 76% mkă hŏng wưng anei thŭn 2025. Hŏng 15 čar, ƀuôn prŏng nah Dhŭng ênoh prăk duh bi liê ala tač êngao čih yap mâo êbeh 22 êklai USD hŏng 1.830 hdră bruă mrâo.

Čiăng iêo mthưr, drông ênoh prăk duh bi liê klă anăp mơ̆ng ala tač êngao hlăm dŭm mlan adôk hlăm thŭn 2026 ăt msĕ mơh thŭn 2027, Knơ̆ng bruă duh bi liê ala tač êngao, Phŭn bruă ngăn prăk leh anăn bi ala knơ̆ng bruă djŏ tuôm dŭm čar nah Dhŭng bi tŭ ư hŏng hdră msir: mprăp êpul mnuih mă bruă mâo klei thâo kơ dŭm hdră bruă ba yua kdrăp mrâo mrang; mprăp dŭm klei găl kơ anôk bruă nah gŭ, pui kmlă mkăp kơ bruă mkra mjing; ksiêm duah gru hmô bi hgŭm mjuăt bi hriăm hluê si klei akâo mơ̆ng dŭm anôk bruă duh mkra ala tač êngao… Hlăm anăn bi mlih mta kñăm mơ̆ng iêo jak prăk duh bi liê hjăn jing mđĭ hnơ̆ng tŭ jăk, boh tŭ dưn leh anăn ai lar bra mơ̆ng klei duh bi liê mơ̆ng ala tač êngao hluê si klei mĭn Hdră mtrŭn mrô 10 mơ̆ng Phŭn bruă kđi čar kơ klei mđĭ kyar bruă duh mkra mâo prăk duh bi liê mơ̆ng ala tač êngao leh anăn dŭm hdră msir hlăm Hdră mtrŭn 280, mơ̆ng Knŭk kna.