Ti anôk mă bruă, bi ala dŭm anôk bruă ba mdah leh dŭm hdră msir msĕ si mtrŭt mđĭ hdră bi hgŭm mlir dhar bruă ƀiădah klă mnuih, klă bruă, klă klei đua klam, mđĭ ktang ba yua kdrăp hâo hưn ênuk mrâo, bi mklă klei čih pioh djŏ tuôm kơ hdră gang mkhư̆, mdrơ̆ng hŏng klei yan adiê ngă, kƀĭn ngă jăk bruă hâo hưn mtô mblang, đăo knăl mơ̆ng kbưi, mơ̆ng hnưm. Klah čŭn mmông mă bruă, K’iăng khua knŭk kna Hồ Quốc Dũng mñă klă: đăo knăl thŭn anei, klei truh mơ̆ng yan adiê jing kjham êdi. 

Boh jhat yan adiê ngă amâo djŏ knŏng hmăi kơ ngăn drăp, klei hdĭp mnuih ƀuôn sang ôh, ƀiădah lŏ bi kdŭn klei đĭ kyar. K’iăng khua knŭk kna mtă kơ dŭm phŭn dhar bruă brei mđĭ hĭn klei dưi đăo knăl, bi mdrơ̆ng hŏng klei anei, bi leh klei dưi kdrăp mă bruă, lŏ ksiêm wĭt bruă knuă. Êlâo kơ truh yan hjan angĭn êbŭ, mkŏ mjing dŭm êpul nao ksiêm dlăng, ktuê dlăng klă grăp hdră êlan, rơ̆ng kơ hnơ̆ng tŭ jăk dŭm hdră êlan bi mdrơ̆ng leh anăn klei mprăp, mđing mrô sa jing răng mgang klei hdĭp leh anăn ngăn drăp mnuih ƀuôn sang.