Khua knŭk kna Lê Minh Hưng lač klă, klei blŭ hrăm yuôm bhăn snăk, jih ai tiê, êlam leh anăn kluôm ênŭm mơ̆ng khua gĭt gai Đảng, Khua lăn čar klă sĭt jing klei mđĭ ai, mtrŭt mjhar prŏng prĭn leh anăn jing dŭm klei mĭn tă hdră êlan kơ knŭk kna, dŭm gưl, dŭm dhar bruă, dŭm alŭ wăl čiăng lŏ dơ̆ng gĭr ktưn, jih ai tiê hluê ngă jăk hĭn bruă klam mâo kčah jao, bi leh tŭ jing dŭm mta kñăm, hnơ̆ng čuăn mđĭ kyar bruă duh mkra ala ƀuôn thŭn 2026 leh anăn wăt wưng 2026-2030.

Mñă klă klei kjăp leh anăn klei gĭr hluê ngă mta kñăm đĭ kyar thŭn 2026 leh anăn wưng 2026-2030 mâo dua ênoh mrô, mbĭt hŏng klei čiăng rơ̆ng kjăp klei hơĭt kjăp bruă duh mkra kluôm, ksiêm dlăng klei prăk luič ênoh leh anăn rơ̆ng dŭm klei bi kna mơ̆ng dŭm anôk bruă duh mkra, Khua Knŭk kna Lê Minh Hưng mñă:

"Ya dhar bruă, ya alŭ wăl dưi mâo leh anăn êgao hdră kñăm mđĭ kyar hlăm 6 mlan akŏ thŭn sơnăn lŏ dơ̆ng gĭr ktưn čiăng mâo hnơ̆ng kdlưn hĭn. Dŭm dhar bruă , dŭm alŭ wăl ka dưi mâo snăn brei gĭr bi leh, boh nik ƀuôn prŏng phŭn Hà Nội leh anăn ƀuôn prŏng Hồ Chí Minh mbĭt hŏng dŭm alŭ wăl uêñ mĭn kơ boh kdrŭt đĭ kyar.  Ară anei 25/34 alŭ wăl brei gĭr ktưn hĭn. Hlăm hdră mkăp mơ̆ng Knŭk kna jao leh hnơ̆ng čuăn, bruă klam klă klơ̆ng kơ grăp dhar bruă, grăp knhuang, grăp anôk, mtă kơ dŭm phŭn, dhar bruă leh anăn boh nik jing dŭm čar, ƀuôn prŏng hlăm Gưl dlông mđing dlăng leh anăn pŏk ngă hluê si hdră kčah, hdră msir gĭt gai mơ̆ng Knŭk kna."

Dŭm klei gĭt gai mơ̆ng khua knŭk kna brei ƀuh Knŭk kna amâo mâo hơưi ôh hŏng dŭm boh tŭ dưn tal êlâo. Boh nik ƀuôn prŏng phŭn Hà Nội leh anăn ƀuôn prŏng Hồ Chí Minh, duâ ƀuôn prŏng mâo hnơ̆ng lu GDP kluôm ala. Tơdah dua anôk anei amâo mâo bi pral, bruă duh mkra hnơ̆ng prŏng dleh dưi truh djŏ hdră kčah.

"Dŭm dhar bruă, dŭm alŭ wăl ka mâo mta kñăm đĭ kyar 2 ênoh mrô snăn brei jih ai tiê bi leh", anei jing sa asăp mtrŭn klă klơ̆ng, brei mâo klei čŏng pô, amâo dêč kơ bruă klam mơ̆ng dŭm anôk bruă dôk êmưt. "Ară anei 25/34 alŭ wăl brei gĭr ktưn kdlưn hĭn mơh", ênoh anei brei ƀuh klei kpĭ bi leh hdră kčah thŭn jing prŏng êdi, hưn lač boh sĭt klei bi hmô bruă duh mkra wăt tơdah mâo gru mngač ƀiădah ka bi knar, čiăng kơ sa klei ngă bruă hŏng hnơ̆ng prŏng čiăng dưi mâo mta kñăm đĭ kyar 2 ênoh mrô hlăm thŭn 2026 leh anăn jih wưng 2026-2031.