Anei jing anôk êlâo kơ thŭn 2018 dưi dlăng jing anôk mâo lu sơnăk phung ngă soh matuĭ mơ̆ng krĭng Yŭ Dưr, ƀiădah ară anei jing leh krĭng lăn êđăp ênang, bruă duh mkra ala ƀuôn đĭ kyar, mnuih ƀuôn sang mâo klei hdĭp trei mđao, yâo mơak, jak iêu lu phung tuê hiu čhưn ênguê mơ̆ng ala tač êngao. Bi ala kơ khua gĭt gai Đảng, Knŭk kna, mơĭt kơ phung bi ala leh anăn jih jang mnuih ƀuôn sang ti alŭ wăl klei êmuh hrăm, klei hơêč hmưi jăk siam hĭn. Lač bruă hluê ngă hdră răng mgang klei êđăp ênang ala čar jing čiăng mjing wăl anôk jăk kơ hdră mđĭ kyar bruă duh mkra–ala ƀuôn, Khua gĭt gai Đảng, Khua lăn čar Tô Lâm mtă kơ ƀuôn Loóng Luông, să Vân Hồ, čar Sơn La brei gĭr mkŏ mjing, pŏk mlar dŭm gru hmô phŭn hlăm hdră mđĭ kyar bruă duh mkra–ala ƀuôn čiăng kơ grăp gŏ sang, grăp čô mnuih ƀuôn sang mâo klei hdĭp mda jăk hĭn, trei mđao hĭn, mta kñăm jing Mnuih buôn sang dưi mâo klei êđăp ênang, dưi mâo klei hdĭp jăk hĭn.

Wưng anei, Khua gĭt gai Đảng, Khua Lăn čar Tô Lâm mbĭt hŏng phung khua kiă kriê Đảng, Knŭk kna mđup brei leh lu hnư mnơ̆ng kơ bruă Đảng, bruă sang čư̆ êa ƀuôn Lóng Luông leh anăn să Vân Hồ; mnuih mâo kơhưm, khua mduôn, khua ƀuôn mâo boh tŭ êdah êdi hlăm bruă răng mgang klei êđăp ênang leh anăn phung nao hgŭm hlăm êpul răng mgang klei êđăp ênang ti alŭ wăl, dŭm gŏ sang Knŭk kna dlăng ba, gŏ sang mâo klei hdĭp dleh dlan.