Quảng Ngãi mâo klei găl mđĭ kyar ana êa drao, kphê, mnơ̆ng hlăm dliê leh anăn kan hdang. Khă snăn, bruă mkra mjing dôk lu jơr, klei bi hgŭm plah wah mnuih ƀuôn sang leh anăn anôk bruă duh mkra ka kjăp, hnơ̆ng mkra mjing êlam dôk kƀah. Kyua anăn, wưng thŭn 2026–2030, čar tă hdră mkŏ wĭt bruă mkra mjing, mkŏ mjing hdră duh mkra, mđĭ hnơ̆ng tŭ jăk mnơ̆ng dhơ̆ng leh anăn pŏk mlar anôk ba čhĭ. Blŭ hrăm ti anôk bi kƀĭn, Võ Văn Hưng, K'iăng khua phŭn bruă lŏ hma leh anăn wăl hdĭp mda mtă kơ čar Quảng Ngãi mđing mđĭ kyar bruă duh mkra dliê lu mta mnơ̆ng mguôp hŏng bruă mkra mjing êa drao, bruă lŏ hma mnơ̆ng dhơ̆ng mâo hnơ̆ng tŭ jăk mguôp hŏng bruă mkra mjing leh anăn bruă kan hdang mrâo mrang. Võ Văn Hưng lač, hŏng êa drao, čar Quảng Ngãi čiăng mkŏ mjing hdră êlan yuôm bhăn mơ̆ng bruă kriê pioh gen, mđĭ kyar mjeh truh kơ bruă mkra mjing êlam leh anăn mkŏ mjing anăn knăl:

"Amâo mâo djŏ knŏng pŏk mlar ênhă dliê, pla mjing amâodah čhĭ mnơ̆ng dhơ̆ng mtŭk mtŭl. Mta kñăm jing mđĭ kyar bruă duh mkra êa drao, mjing dŭm mta mnơ̆ng mâo hnơ̆ng kreh knhâo lu, mâo anăn knăl leh anăn ênoh yuôm bruă duh mkra prŏng".

Sa hlăm dŭm anôk gun kpăk mâo anôk bruă duh mkra lač ti anôk bi kƀĭn jing kƀah krĭng pla mjing kƀĭn sa anôk. Phan Văn Hồng, Khua Knơ̆ng bruă pla mjing, Knơ̆ng bruă mguôp hnư mkra mjing mnơ̆ng mơ̆ng lŏ hma Sao Mai brei thâo, thŭn 2026, anôk bruă bi hgŭm hŏng hlăm brô 120 anôk mkăp, êpul hgŭm bruă leh anăn gŏ êsei mnuih ƀuôn sang pla êbeh 581 héc ta c̆êñ hruê̆ leh anăn tei nan. Ênoh mnơ̆ng dhơ̆ng hrui blei hlăm brô 22.000 ton, hlăk êjai klei c̆iăng mơ̆ng sang maĭ hlăm brô 75.000 ton grăp thŭn. Phan Văn Hồng akâo kơ c̆ar Quảng Ngãi đru ruh mgaih klei gun kpăk kơ wăl anôk lăn, mđĭ kyar krĭng pla mjing, anôk bruă êlan klông leh anăn mkăp mrô krĭng pla mjing:

"Knŏng mâo lăn, mâo lăn kơh mâo krĭng pla mjing, kơh dưi mkŏ mjing leh anăn dưi ngă kdrăp mrâo mrang".

Hrăm mbĭt uêñ mĭn kơ bruă anei, Nguyễn Trung Kiên, K'iăng khua knơ̆ng bruă kphê Việt Nam mtă, alŭ wăl đru ksiêm dlăng hră mơar klei bhiăn kơ lăn ala, bi mklă krĭng pla mjing, msir mgaih klei bi mmiă leh anăn mkŏ mjing klei hâo hưn pioh tui duah phŭn agha:

"Akâo kơ Knơ̆ng bruă sang čư̆ êa čar Quảng Ngãi gĭt gai dŭm knơ̆ng, dhar bruă leh anăn bruă sang čư̆ êa gưl să bi hgŭm mkăp klei hâo hưn kơ hdră čuăl mkă, klei ba yua lăn leh anăn anôk bruă nah gŭ. Hluê anăn, anôk bruă duh mkra dưi ksiêm dlăng, bi mklă krĭng pla mjing djŏ guôp, ñĕ kơ klei pla mjing dŭm mta ana mnơ̆ng dhơ̆ng, rơ̆ng klei dưi leh anăn klei tŭ dưn djŏ hdră bhiăn mơ̆ng pô yua lăn" .

Hlăm bruă duh mkra êa ksĭ, Trần Đình Luân, Khua Knơ̆ng bruă kan hdang lač, mnơ̆ng dhơ̆ng leh anăn hnơ̆ng mkra mjing kan hdang mơ̆ng Quảng Ngãi ka năng hŏng klei găl. Čar čiăng mkŏ dăp êpul kŭm păn, mtrŭt mđĭ hdră bi mlih bruă trah mă amâo tŭ dưn, mđĭ hnơ̆ng tŭ jăk kriê dlăng leh trah mă leh anăn jak iêu anôk bruă duh bi liê mkra mjing êlam. Hŏng bruă rông mnơ̆ng hlăm êa, brei bi mklă krĭng rông êa ksĭ, ba yua klei găl 180 ênao mgơ̆ng êa, mbĭt anăn mđĭ kyar dŭm mta mnơ̆ng dhơ̆ng mdê hjăn mguôp hŏng bruă răng mgang mnơ̆ng dhơ̆ng leh anăn hiu čhưn ênguê. Trần Đình Luân lač snei:

"Čiăng iêo mthưr phung duh mkra mŭt rông hlăm êa ksĭ snăn čar brei bi klă êdi anôk anei dưi rông, anôk anei dưi đĭ kyar snăn kơh mâo phung duh mkra mŭt. Mơ̆ng anăn lŏ dơ̆ng ba truh kơ klei mjeh, rông, mkra mjing leh anăn mkra mjing".

Hồ Văn Niên, Khua bruă Đảng čar Quảng Ngãi brei thâo, leh bi mŭt čar Quảng Ngãi lehanăn čar Kon Tum, alŭ wăl mâo wăl anôk đĭ kyar mrâo, bi kƀĭn klei găl ktuê hang ksĭ kwar Krah lehanăn lăn dap kngư. Anei jing tur knơ̆ng čiăng mkŏ klei găl kơ bruă tuh tia mkra mjing, kdrŭn ksĭ, kan hdang, bruă lŏ hma mâo hjăn, êa drao leh anăn bruă dliê kmrơ̆ng hơĭt kjăp. Hồ Văn Niên lač:

"Klei dôk kčah amâo mâo djŏ knŏng mđĭ lar ya mta klei mâo leh, ƀiădah lŏ mkŏ wĭt bruă duh mkra pla mjing, mđĭ lar ai dưi, mđĭ ênoh yuôm leh anăn rơ̆ng klei đĭ kyar bi knar plah wah bruă duh mkra, ala ƀuôn hŏng bruă răng mgang mnơ̆ng dhơ̆ng, wăl hdĭp mda".

Hnơ̆ng trah dlăng truh thŭn 2045, čar Quảng Ngãi mđing truh kơ klei mđĭ kyar bruă lŏ hma mrâo mrang, jing anôk phŭn mkra mjing êa drao, mkra mjing kyâo leh anăn mđĭ kyar bruă duh mkra êa ksĭ hlăm tur knơ̆ng bruă duh mkra mtah, bruă duh mkra kluôm.