Dưi kkiêng ti krĭng ƀuôn sang ƀun Êa Sup, čar Dak Lak, klei găl hriăm hră adôk dleh dla, mniê êra Mường Hoàng Thị Thu Phương hgao leh klei dleh čiăng tuič mngač klei čang hmăng mơ̆ng pô. Ară anei jing Sinh viên thŭn tal 4 hriăm bruă Kriê dlăng mnuih mă bruă ti Sang hră gưl prŏng Mnuih mă bruă Yang ƀuôn ti ƀuôn prŏng Hồ Chí Minh, Phương amâo djŏ knŏng mâo boh tŭ kdlưn hlăm hdră hriăm ƀiădah lŏ jing mnuih hgŭm hlăm êpul mă bruă đru kơ ala ƀuôn ti Sang hră lehanăn ƀuôn sang pô, kreh nao hgŭm hlăm hdră ba anăp đru kơ ƀuôn sang.

“Mnuih mă bruă amâo dưi kƀah ôh čiăng mđĭ kyar sa krĭng ƀuôn sang, kyua anăn kâo mĭn srăng mâo sa hdră nao hlăm wưng sui kơ êdei anăp. Mbĭt anăn, kâo mĭn pô ăt mâo klei thâo kiă kriê amâo dah kriê dlăng sa êpul bruă snăn yơh kâo hriăm bruă Kriê dlăng mnuih ngă bruă anei. Kâo ăt čiăng wĭt duh myơr klei thâo pô kơ ƀuôn sang, tơdah mâo klei găl kâo čiăng myơr klei thâo lehnăn dưi mă bruă ti kdriêk pô.

H’Uyên Byă, mniê êra Êđê ti kdriêk Krông Bông, čar Dak Lak, ară anei jing sinh viên ti sa boh Sang hră gưl prŏng ti ƀuôn prŏng Hồ Chí Minh. Mơ̆ng thŭn tal êlâo mtam, H’Uyên lui leh mmông nao hgŭm hlăm hdră Yan mdei prŏng Mtah, myơr êrah lehanăn dŭm hdră mkăn ti Sang hră. Mă bruă thiăm lehanăn nao hlăm hdră ba anăp đru kơ mnuih knap mñai đru leh kơ H’Uyên mđĭ klei thâo, klei jhŏng pô čiăng kơ ñu dưi ba wĭt boh tŭ dưn hĭn hŏng bruă ngă nai pô ti krĭng ƀuôn sang pô hlăm êdei anăp.

“Hlăk dưi hriăm ti ƀuôn prŏng Hồ Chí Minh, sa ƀuôn prŏng đĭ kyar êdi snăn kâo mĭn pô srăng dưi ba yua klei thâo, klei hriăm anăn wĭt kơ ƀuôn sang pô, lŏ mtô bi hriăm, kah mbha klei thâo anăn kơ phung hđeh lehanăn đru kơ phung hđeh mâo tur knơ̆ng hơĭt kjăp hĭn hlăm yang ƀuôn ñŭ kma msĕ si ară anei”.

        Bi hŏng H’Sian Êban, djuê ana Êđê, ti kdriêk Krông Pač, klei čang hmăng đru kơ mnuih ƀuôn sang pô thâo săng kơ hdră bhiăn lehanăn bi hrŏ klei amâo jăk djŏ tuôm kơ bruă hdră bhiăn, mơ̆ng hđeh adei gĭr hriăm thâo čiăng jing sa čô mă bruă msir mkra kđi klei kơ ƀuôn sang pô. Ară anei, dôk hriăm thŭn tal 3 Sang hră ksiêm hriăm kơ bruă phat kđi ƀuôn prŏng Hà Nội, H’Sian amâo djŏ knŏng mâo boh tŭ hriăm hră kdlưn hĭn ƀiădah lŏ jing sa gru mngač êdah êdi ngă bruă klam gai hdră, pral kdal hlăm hdră bruă êpul êya. H’Sian gĭr srăng wĭt kơ ƀuôn sang pô leh ruê̆ hriăm.

“Mơ̆ng tal êlâo, kâo mĭn tĭng lač leh hŏng amĭ ama srăng wĭt ti Dak Lak mă bruă mđĭ kyar ƀuôn sang pô. Mâo lu yơh mnơ̆ng nah êngao adih, ƀiădah lu mnuih êmuh, nao hgŭm hlăm lu hdră bruă jăk msĕ snăn, hriăm mâo boh tŭ kdlưn mơh, si ngă čiăng dôk tinei mă bruă mđĭ kyar mơ̆, ƀiădah kâo lač srăng wĭt ti Dak Lak čiăng mđĭ klei thâo, mđĭ kyar kơ ƀuôn sang pô.

        Čar Dak Lak mâo dŭm êbâo čô sinh viên mnuih djuê ƀiă dôk hriăm ti dŭm sang hră gưl prŏng, gưl krah hlăm kluôm ala. Hlăm anăn, mâo lu phung sinh viên gĭr ktưn kpưn đĭ hlăm klei hriăm hră, nao hgŭm hlăm hdră bruă kyua êpul êya hlăm lehanăn êngao sang hră. Anei ăt jing gru mngač hlăm hdră bruă êpul ti Sang hră gưl prŏng, gưl krah ăt msĕ mơh jing gru bi hmô jăk tơdah wĭt mjĕ mjuk, mă bruă ti krĭng ƀuôn sang.

        Amai H’Giang Niê, Khua bruă Đoàn čar, Khua Êpul hgŭm Sinh viên čar Dak Lak brei thâo, hŏng bruă đua klam mơ̆ng pô, êpul bruă đoàn, sinh viên mjing nanao klei găl čiăng kơ phung sinh viên, boh nik sinh viên mnuih djuê ƀiă nao hgŭm hlăm hdră bruă đoàn, êpul. Dŭm êpul hgŭm “Sinh viên 5 jăk” ti dŭm sang hră gưl prŏng dưi mkŏ mjing hŏng mta phŭn lehanăn lu hdră kñăm jak iêu sinh viên nao hgŭm.

“Hmei čiăng mđing truh kơ phung sinh viên brei thâo săng klei pô čiăng, čŏng pô tă hdră êlan čiăng nao lehanăn hmei hrăm mbĭt hŏng jih janh hlăm bruă mjuăt bi hriăm, mđĭ klei bi mjĕ hlăm ala ƀuôn. Êngao klei yăl dliê, klei hriăm ti sang hră, brei mâo klei thâo hluê ngă hlăm ala ƀuôn, hlăm anăn yuôm bhăn hĭn brei mđĭ klei đua klam hlăm bruă krơ̆ng kjăp, mđĭ lar knhuah dhar kreh jăk siam mơ̆ng djuê ana pô mơ̆ng anăn drei srăng jing pô mtô mblang čiăng lar bra dŭm klei jăk siam hlăm yang ƀuôn”.

       Kbưi mơ̆ng ƀuôn sang, phung sinh viên mnuih djuê ƀiă ti Dak Lak lŏ sĭt êmĭt tui hriăm, mđĭ klei thâo săng, klei mjuăt bi hriăm ti dŭm sang hră gưl prŏng, gưl krah lehanăn đru mguôp ai hlăm lu hdră bruă kyua êpul êya. Mjĕ hŏng wăl anôk hriăm hră mrâo mrang, phung sinh viên amâo mdei gĭr ktưn lehanăn mđing truh kơ ƀuôn sang, klei čang hmăng duh myơr kñăm mkŏ mkra ƀuôn sang pô. Anei srăng jing gru mngač đru mguôp hlăm hdră mđĭ kyar mơ̆ng Dak Lak lehanăn êpul êya grăp djuê ana hlăm wưng ti anăp./.