Knăm mphŭn pŏk mâo klei nao hgŭm mơ̆ng Khua knŭk kna Lê Minh Hưng, Khua knŭk kna pă ala čar ASEAN, mâo: Khua knŭk kna Lào Sonexay Siphandone, Khua knŭk kna Campuchia Hun Manet, Khua knŭk kna Thái Lan Anutin Charnvirakul lehanăn Khua knŭk kna Timor-Leste Kay Rala Xanana Gusmão.

Ti anôk kƀĭn trông, Khua knŭk kna Lê Minh Hưng mphŭn hŏng sa klei êmuh, anăn jing sa tar rŏng lăn dôk bi mlih, bruă mâo hruê anei jing amâo djŏ ASEAN si srăng ngă, ƀiădah si ASEAN srăng tă hdră kơ êdei anăp hlăm ênuk gưl 21? Ksiêm dlăng 59 thŭn mkŏ mkra lehanăn đĭ kyar, Khua knŭk kna mñă, anei jing ktuê êlan mkŏ mkra knhuah dhar kreh mơ̆ng ASEAN lehanăn lač, dŭm thŭn mlan ti anăp srăng jing ktuê êlan tă hdră kơ êdei anăp mơ̆ng ASEAN hlăm sa rŏng lăn dôk mđĭ klei ba yua kdrăp mrô, kdrăp mrâo hlăm hdră kriê dlăng lehanăn bi mlih mtah dôk bi mklă gru hmô đĭ kyar. Mñă klă boh tŭ yuôm mơ̆ng ASEAN hlăm thŭn mlan ti anăp jing bi mklă sa êpul êya hgŭm mguôp, čŏng pô kpưn đĭ nao hgŭm rơ̆ng kjăp klei êđăp ênang, bi hgŭm lehanăn đĭ kyar krĭng wăl lehanăn tar rŏng lăn… Khua knŭk kna mñă, Việt Nam ƀuăn hrăm mbĭt hŏng ASEAN hŏng klei cang hmăng mĭn mrâo kơ êdei anăp, kyua klei êdei anăp mơ̆ng Việt Nam mguôp kjăp hŏng klei êdei anăp mơ̆ng ASEAN ăt msĕ mơh klei êđăp ênang, hơĭt kjăp lehanăn đĭ kyar mơ̆ng kluôm krĭng./.