VOV4.Êđê - Sang amâo djŏ knŏng jing anôk dôk phung hlăm gŏ sang đuič ôh ƀiădah lŏ jing anôk mkŏ mjing dŭm klei bhiăn ngă yang yuôm bhăn djŏ tuôm kơ klei hdĭp ai tiê êpul êya. Kyua anăn, leh mkra sang, mnuih M’Nông khăng mkŏ mjing klei ngă yang mŭt dôk sang mrâo, hŏng klei bhiăn jiă kma knhuah dhar kreh djuê ana, mâo lu klei jăk siam.

Hlue anăn, leh mkra sang, pô sang ruah hrue hrue jăk mmông ênang pioh đĭ dôk sang mrâo. Jih jang mnơ̆ng duh bi liê amâo mâo luh liê lu ôh knŏng sa drei mnŭ, sa boh giêt êa, sa klŏ hdăng, lehanăn sa kriăk kpiê čeh. Leh nao mŭt hlăm sang mrâo, bruă tal êlâo bi mâo anăn jing čŭt giê Njeh pia jing pô kiă sang dua nah čur knur kă êriâo, tĭng nah dlông cŭt tiê mnŭ, lehanăn sa nah čŭt tiê ŭn. Njeh dưi drŏng ti ƀăng bhă mŭt kbiă, lehanăn pia jing pô kiă sang mrâo mdơ̆ng. Leh pô sang dưm giêt êa ti anăp ƀăng bhă sang akâo kơ yang jing pô kiă sang brei klei dưi piăt êmiêt sang mrâo, snăn kơh mnuih tui tluôn srăng djă giêt êa, lehanăn dŭm mjeh mnơ̆ng pla mbĭt hŏng sa klŏ anghar pui adôk trơ̆ng nao mŭt hlăm sang mrâo. Lehanăn jih jang mnuih hlăm sang dưi djă ba mnơ̆ng mnuă mŭt hlăm sang.

Leh bi mŭt mnơ̆ng mnuă hlăm sang, pô sang knang kơ mnuih mâo klei thâo bi hmô jăk, mâo k’hưm kuič brei pui, jing bi hmô ba klei hdĭp mda jăk yâo kơ sang mrâo. Hŏng klei kwưh: “Kâo akâo kơ yang kpur, yang pui kuič mngač nanao, čiang bi mđao kơ sang mrâo. Akâo kơ phung yang brei klei mbha mbhai myun mdan kơ jih jang mnuih hlăm sang, mâo nanao klei suaih pral, mâo klei bi mguôp, thâo bi khăp sĭt suôr mbĭt”.

Leh ruĕ klei bhiăn ngă yang kpur, pô sang khat kkuê mnŭ, lehanăn mă êrah mtlaih hŏng kpiê, tak ti giê Njeh lehanăn jih jang mnơ̆ng yua hlăm sang. Tak êrah êjai kwưh êjai: “Kâo akâo kơ yang Kuăt, kâo akâo kơ yang kpur, yang pô kiă sang, kâo akao kơ yang Jiun Ngo, kâo kâo kơ yang êa, kơ yang mnư̆... Kâo mă êrah mnŭ anei bi lŭk hŏng kpiê pioh tak hlăm jih jang mnơ̆ng mnuă yua hlăm sang, lehanăn hmăng hmưi kơ jih jang mnơ̆ng anăn jing dŏ yuôm bhăn pioh yua kơ klei hdĭp. Akâo kơ yang jăk ai tiê thiê brei klei jăk jĭn kơ anak čô hlăm sang thâo bi mguôp hdĭp êđăp ênang mbĭt, mâo klei suaih pral nanao. Ngă hma čư̆ mâo lu mdiê, hdĭp jăk yâo mơak mñai. Akâo kơ jih jang yang adiê, yang jăk mkăn hriê hrăm mbĭt hŏng hmei mnăm kpiê čeh, ƀơ̆ng điŏ brông, ƀơ̆ng čĭm ăm...”.

Jih klei ngă yang, khua mduôn mă kpiê jur mơ̆ng čeh brei kơ pô sang mnăm êlâo, leh kơ anăn pô sang lŏ gai kơ khua mduôn, hrăm mbĭt hŏng jih jang mnuih hlăm sang bi mnăm sơăi. Phung mduôn khua srăng bi yăl dliê yơh hŏng čô anak thâo bruă yuôm bhăn klei ngă yang đĭ dôk sang mrâo, leh kơ anăn mâo mnuih dơ̆ng bi kưt mmuiñ hơêč hmưi kơ pô sang.

Điểu Mrưng ti bon Dak Rmoan, să Dak Rmoan, wăl krah Gia Nghiã brei thâo: “Klei bhiăn ngă yang đĭ dôk sang mrâo mnuih Mnông êngao kơ mta kñăm čiăng hơêč hmưi kơ pô sang, găp djuê mâo klei suaih pral, duh ƀơ̆ng bi mâo klei tŭ dưn, lŏ mâo klei yuôm bhăn mjuăt bi hriăm jih jang mnuih thâo săng kơ klei tŭ dưn mă bruă knuă, thâo bi mpŭ hdơ̆ng găp, thâo bi khăp ayŏng adei, lehanăn jih jang yang ƀuôn. Knăm ngă yang đĭ dôk sang mrâo mnuih Mnông amâo mâo djŏ knŏng hlăm knua gŏ sang găp djuê đuič ôh, ƀiădah lŏ bi jak iêu tue êgar jĕ giăm taih kbưi, ti dŭm boh ƀuôn riêng gah. Jih jang mnuih hriê bi čhưn hrăm mnăm huă, bi yăl dliê mơak, bi hơêč hmưi hdơ̆ng găp klei suaih pral, klei jăk yâo hlăm bruă knuă”./.