VOV4.Êđê - Mphŭn hlăm yan buh pla mrâo, mnuih ƀuôn sang ƀuôn O Pêch, să Ia Pêch, kdriêk Ia Grai, čar Gia Lai lŏ mkŏ mjing Knăm ngă yang iêu hjan ti sang dlông hlăm ƀuôn. Klei bhiăn ngă yang anăn mâo mnuih ƀuôn sang kriê pioh leh anăn mđĭ lar hlăm lu thŭn, jing bruă klei đaŏ mơ̆ng aduôn aê, mâo ênoh yuôm ai tiê prŏng prĭn hlăm klei hdĭp mnuih Jarai.

Ti krah yan adiê không amâo mâo hjan, mnuih ƀuôn sang ti ƀuôn O Pêč mtlŭk mtlak bi mprăp kơ klei ngă yang iêu hjan ti ƀuôn sang. Ti gŭ êyui ana blang, ti djiêu jum dar sang roong, mâo dŭm êpul mnuih bi ngă bruă mdê mdê kơ klei ngă yang. Bi kƀĭn êpul phung mniê hlăm ƀuôn leh anăn mbha êpul čiăng mprăp kơ bruă tŭk knă êsei djam. Phung êkêi êdam mâo bruă nao koh đrao, ana kram, nao hlăm hnoh êa mă abao, mă kan leh anăn đru kơ phung mduôn khua hlăm buôn mă dŭm bruă ktrŏ kơ klei ngă yang. Jih jang mnuih srăng mâo bruă mă sơaĭ kyuanăn jih jang mâo nanao klei hur har.

Khua mduôn Rlan Li - khua ngă yang nao kƀiă, nao mŭt čiăng ksiêm dlăng leh anăn mtă mtăn kơ dŭm klei mprăp êmiêt, khua mduôn bar kpin, hơ ô ao djuê ana leh anăn păn kưn hrah ti dlông boh akŏ. Klei ngă yang anei jing yuôm bhăn êdi, kyua năn ñu mâo klei uêñ mĭn sơnăk čiăng kơ mnuih ƀuôn sang dưi đăo knang kơ bruă ngă yang. Dŭm čô phung khua mduôn mkăn ăt hmar mlih čhum ao mprăp kơ klei ngă yang. Khua mduôn Rlan Li lač:

“Grăp thŭn ti ƀuôn hmei mkŏ mkra nanao klei ngă yang iêu hjan, kreh mkŏ mkra hlăm mlan 4, mlan 5 grăp thŭn. Ngă yang čiăng akâo kơ Yang dưi brei jăk êa hlĭm hjan, kơ ana kyâo, dưi bi êđăp lăn, mda siam, akâo kơ phung mnuih ƀuôn sang dưi mâo klei suaih pral, trei mđao”.

Liăp 10 mmông, 3 čô khua mduôn pŭ ba hlao mnơ̆ng ngă yang mâo sa drei mnŭ dưi ăm ksă, kpăt braih, hra dưm dlông hla mtei ti dlông sang roong. Hlăm lam sang ti djiê mtih dăp leh sa boh čeh kpiê. Dưm hmăm mnơ̆ng ngă yang kơ gŭ hŏng klei ênang leh anăn khua mduôn Rlan Li răk klei ngă yang čiăng hưn hŏng yang hruê anei ti ƀuôn O Pêč ngă klei mgă yang iêu hjan, myơr mnơ̆ng ngă yang kơ Yang, hmăng hmưi Yang srăng đru kơ mnuih ƀuôn sang sa thŭn mă bruă êđăp ênang, mâo klei mkŏ mjing jăk, jih jang mnuih ƀuôn sang mâo klei suaih pral, amâo mâo klei êngoh tưp ôh. leh bruă anăn khua mduôn Rlan Li yua sa hla kyâo brăh êa kpiê mơ̆ng mdhô̆ truh kơ tria sang. Klei ngă yang bi ruê hŏng klei lač jăk mơ̆ng khua mduôn Rlan Li ti anăp băng bhă sang roong.

Tal êlâo hĭn dưi đru phung mduôn khua mprăp kơ klei ngă yang, ayŏng Ksor Aih mơak snăk, êran nao kơ nei, nao kơ dih čiăng ksiêm dlăng jih jang bruă, ayŏng Ksor Aih lač: “dŭm hruê êlâo, kâo leh anăn dŭm phung êdam êra nao koh ana đrao, kram čiăng wĭt ngă điŏ brông, koh djuh kơ amei adei tŭk knă êsei djam, leh anăn nao mă abao ti hnoh êa, dưi tui hlue dŭm čô khua mduôn nao mprăp kơ klei ngă yang, kâo mâo lu êdi klei hriăm. Leh amâo dôk phung khua mduôn phung hlăk ai srăng jing phung čuê kơ bruă diñu leh anăn leh anăn srăng lŏ djă pioh, mkŏ mjing klei ngă yang anei grăp thŭn”

Klei ngă yang iêu hjan ti ƀuôn O Pêč dưi mâo klei truăn mĭn, đru mkŏ mkra mơ̆ng bruă sang čư̆ êa kdriêk ia Grai leh anăn sang kdŏ mmuñ Dam Săn. Đỗ Văn Đông, k’iăng khua bruă sang čư êa kdriêk Ia Grai brei thâo: Leh thâo kơ bruă sang kdŏ mmuñ Dam Săn mâo bruă lŏ wĭt mkŏ mjing dŭm klei ngă yang knhuah gru djuê ana mnuih djuê ƀiă, hmei mâo mtam klei sa ai. Mnuih ƀuôn sang ti să Ia Pêč leh anăn wăt kơ ƀuôn O Pêč mơ̆ng đưm đă mâo lu klei ngă yang leh anăn dưi djă pioh dŭm klei ngă yang nao mbĭt hŏng klei hdĭp msĕ si ngă yang kơ êa, ngă yang dliê, ngă yang iêu hjan…Đỗ Văn Đông brei thâo: “Anei jing wưng čiăng râo klei khăp, klei bi mguôp hlăm yang buôn, leh anăn mnuih ƀuôn sang dưi mâo klei ba mdah klei siam mơ̆ng knhuah gru djuê ana pô truh kơ jih jang mnuih.”