VOV4.Êđê- Ti anăp klei ruă tưp dleh ktuê dlăng, hŏng ênoh mnuih ruă Covid-19 ƀrư̆ hruê ƀrư̆ đĭ, hlăm hruê 5/1, Khua Knơ̆ng bruă sang čư̆ êa ƀuôn prŏng Đà Lạt (Lâm Đồng) mâo leh hdră mtrŭn mkŏ mjing 16 anôk mdrao mgŭn êrô hiu ti jih dŭm să, ƀuôn hgŭm ti ƀuôn prŏng. Trần Thị Vũ Loan,  K’iăng Khua Knơ̆ng bruă sang čư̆ êa ƀuôn prŏng Đà Lạt brei thâo, bruă mkŏ mjing dŭm anôk mdrao mgŭn êrô hiu jing čiăng êdi pioh kriê dlăng klei suaih pral kơ mnuih ruă  Covid-19 dôk mdrao ti sang, mbĭt anăn pral mdrơ̆ng hŏng djăp klei mâo hlăm boh klei ruă Covid-19 dleh ktuê dlăng.

Yap truh ară anei, ƀuôn prŏng Đà Lạt mâo jih jang êbeh 2.200 čô mnuih ruă Covid-19, hlăm anăn lu dưi mdrao hlao leh anăn kbiă mơ̆ng sang êa drao. Ară anei adôk 784 čô mnuih dôk mdrao mgŭn, hlăm ênoh anei mâo êbeh 400 čô dôk mdrao ti sang; 8/16 să ƀuôn hgŭm mâo klei ruă tưp gưl 3 - hnơ̆ng huĭ hyưt hĭn hŏng Covid-19.

Pô mblang: H’Zawut Ƀuôn Yă