VOV4.Êđê - Ênoh ksiêm yap mơ̆ng Anôk bruă ktuê dlăng klei ruă čar Dak Lak brei ƀuh, mơ̆ng akŏ thŭn truh ară anei, kluôm čar yap mâo 341 čô mâo klei ruă jơ̆ng kngan ƀăng êgei, đĭ giăm 3,4 blư̆ mkă hŏng wưng anei thŭn dih, hlăm anăn mâo sa čô djiê. Ênoh mnuih ruă mâo hlăm jih jang 15 kdriêk, wăl krah, ƀuôn prŏng leh anăn đĭ pral hlăm dŭm hruê kăm giăm anei hŏng hnơ̆ng kah knar grăp hruê kăm mâo 40 čô ruă mrâo. Anôk bruă ktuê dlăng klei ruă čar brei thâo, čiăng pral gang mkhư̆ klei ruă jơ̆ng kngan ƀăng êgei, mnuih ƀuôn sang brei hluê ngă: rao kngan nanao hŏng ƀu lu blư̆, êlâo kơ čiêm hđeh ƀơ̆ng, êlâo kơ pŭ hđeh, leh nao sang tlô amâo dah bi blih hnun, sut asei mlei hđeh. Mbĭt anăn, ngă jăk bruă doh êƀăt huă mnăm, sut bi mdoh pưk sang, mnơ̆ng dhơ̆ng djă grăp hruê msĕ si mnơ̆ng hlăp lêñ, kdrăp hriăm hră, anôk păn êlan êñan, jhưng mdhô̆ hŏng êa mdjiê kman.

H Zawut pô mblang