VOV4.Êđê- Hlăm wưng êgao, sang êa drao prŏng krĭng Lăn Dap Kngư tŭ mă leh anăn mdrao kơ dŭm pluh čô hđeh mâo klei ruă MIS-C (klei ruă lu mta) êdei Covid-19, hlăm anăn mâo hđeh ruă kjham, toh hroh êlan bi êwa, ruă kboh huĭ arưp kơ klei hdĭp.

Dôk dlăng kriê anak ti Sang êa drao prŏng krĭng Lăn dap kngư, amai Vũ Thị Hương, ti ƀuôn hgŭm Tân Lập, ƀuôn prŏng Ƀuôn Ama Thuôt, čar Dak Lak brei thâo: Sui hŏng anei êbeh 1 mlan, anak êkei 7 thŭn mơ̆ng amai êngoh, gŏ sang amai brei ĕ mnăm êa drao lưh hlơr lehanăn ƀuh ĕ lŏ suaih, hlăp lêñ msĕ aguah tlam kyua anăn gŏ sang amâo nao ksiêm bi mklă klei ruă COVID-19 kơ ĕ. Khă snăn, hlăm brô 5 hruê kăm êdei, ĕ kreh êngoh hlơr nanao amâo thâo lưh kyua anăn gŏ sang brei ĕ nao ti sang êa drao. Leh mâo phung nai aê mdrao ksiêm mkă dlăng bi mklă, boh tŭ brei ƀuh ĕ lŏ djŏ MIS-C leh ruă Covid 19.

 “Huĭ hyưt êdi, kyuadah pô amâo thâo hnưm snăn truh kơ ară anei hriê dŏng mdrao gơ̆ sui êdi, bi tơdah thâo hnưm ĕ mâo klei ruă leh djŏ Covid, pô nao mdrao hnưm snăn ĕ srăng suaih pral hĭn, dul ƀiă mơh”. 

Ăt msĕ hŏng amai Hương, ayŏng Nguyễn Chí Quốc ti ƀuôn hgŭm Êa Tam, ƀuôn prŏng Ƀuôn Ama Thuôt ñu bi kngăr lehanăn huĭ êdi hlăk phung nai aê mdrao brei thâo anak mniê ñu lŏ djŏ MIS-C leh ruă COVID-19.

  “Klei bi êdah tal êlâo mơ̆ng ĕ anăn jing ĕ êngoh 4 hruê đrông lehanăn hruê tal 5 kơh nao ba ti sang êa drao, êngoh bi mƀlĕ êrah, ruă kŏ asei, bi wĭr kŏ, ƀlĕ ô̆, amâo dưi ƀơ̆ng mnơ̆ng ôh. Phung nai aê mdrao ăt đru jih ai tiê lehanăn dŏng mdrao truh kơ ară anei ĕ dul ƀiă mơh, jih jang klei bi êdah mơ̆ng kleĭ ruă anei amâo đei mâo ôh, ară anei huă ƀơ̆ng leh, suaih leh mơh hlăm asei mlei”.

Aê mdrao dôk ksiêm mkă đeh mâo klei ruă MIS-C leh ruă COVID-19 ti Sang êa drao krĭng Lăn Dap Kngư

Hluê si Nai prĭn, aê mdrao Trần Thị Thúy Minh, Khua adŭ mdrao klei ruă ti phung hđeh mơ̆ng Sang êa drao prŏng krĭng Lăn dap kngư, klei lŏ djŏ MIS-C jing ruă êka hlăm dŭm anôk hlăm asei mlei msĕ si kboh, ksŏ, boh ƀleh, kŏ dlô, klĭt, ală lehanăn dŭm anôk hlăm êlan prôč tian ti phung hđeh hlăm wưng mơ̆ng 4 – 8 hruê kăm leh djŏ Covid 19. Anei jing klei bi kdơ̆ng hŏng ai dưi mdrơ̆ng hŏng klei ruă kjham, huĭ hyưt êdi kơ phung hđeh, lui lu klei truh amâo jăk, đa đa hlŏng truh kơ djiê.

 “Klei lŏ djŏ MIS-C leh ruă COVID-19 amâo tui hluê drei ruă Covid ktrŏ amâo dah hdjul. Aê aduôn, amĭ ama mâo anak djŏ Covid 19 amâo dah đing djŏ Covid 19 êlâo anăn, snăn mơ̆ng 4 – 8 hruê kăm tơdah hđeh êngoh êbeh kơ 3 hruê, ală mta hrah, kƀuê hrah, bi đung êrah, ruă tian eh m’êa, amâo suaih amâo dah jơ̆ng kngan bŏk brei drei nao mtam kơ anôk bruă mdrao mgŭn giăm anăn čiăng ksiêm mkă dlăng lehanăn pral dŏng mdrao, bi hrŏ klei truh amâo jăk kơ hđeh huĭ tăm mâo.

Klei lŏ djŏ MIS-C leh ruă COVID-19 kjham lehanăn huĭ hyưt êdi hŏng phung hđeh, Khă snăn, tơdah pral thâo lehanăn dŏng mdrao hnưm, ksiêm bi mklă djŏ lehanăn mdrao djŏ guôp, lu hđeh ruă srăng pral hlao. Čiăng kơ phung hđeh amâo lŏ djŏ klei ruă anei, brei gŏ sang thâo răng mgang phung hđeh đăm djŏ COVID-19. Brei hđeh tlŏ vaccine COVID-19 kñăm bi hrŏ klei ruă ktrŏ lehanăn bi hrŏ klei djiê tơdah tăm djŏ klei ruă./.

Pô mblang: H’Nêč Êñuôl