VOV4.Êđê - Giăm 2 mlan êgao, mniê ngă bruă mdrao mgŭn H’Wi Ƀuôn Yă 33 thŭn, mă bruă ti Anôk dŏng mdrao mjêč Anôk bruă mdrao mgŭn kdriêk Ea Kar dưi tiŏ nao ngă bruă ti Sang êa drao jing jai mrô 1 mdrao mnuih ruă Covid-19 čar Dak Lak hruê mlam jih ai tiê kriê dlăng mnuih ruă. Amai H’Wi dlăng kơ mnuih ruă msĕ si găp djuê hlăm gŏ sang, grăp mnĭt mmông hlăm klei mprăp čiăng đru kơ mnuih ruă sĭt mâo klei čiăng.

Klei mă bruă mmông aguah mơ̆ng nai mdrao H’Wi Ƀuôn Yă kčưm hŏng dŭm bruă mdrao mgŭn msĕ si, tlŏ, bi mbŏ êa, mdưm đĭng bi êwa, ƀuôp mă êa k’hak kơ mnuih ruă leh anăn đru kơ phung êa mdrao mkăn ngă bruă. Leh anăn amai lŏ nao ti jhưng phung mnuih ruă dôk đih, êmuh klei suaih pral, mđĭ ai phung ruă čiăng kơ diñu hnưm hlao klei ruă. “Êjai mrâo hriê mă bruă ti nei, kâo ênguôt kơ pưk sang êdi leh anăn mâo mơh klei huĭ, boh nik hlăm wưng klei ruă tưp Covid-19 bluh đĭ msĕ ară anei, kâo hiu tưp djŏ klei ruă, kâo ƀuh lu phung ngă bruă mbĭt djŏ klei ruă anei, dlăng kơ phung mnuih ruă, kâo hning kơ sang kâo sơnăk. Ƀiădah leh nao mŭt mă bruă ăt mâo klei hơĭt mơh. Kâo pô mâo nanao klei čŏng mđĭ ai srăng ngă bruă jăk, čiăng kơ phung ruă hnưm suaih pral, hnưm dưi wĭt kơ sang”

Nai mdrao H’Wi Ƀuôn Yă brei thâo, khădah ngă leh bruă mdrao mgŭn mâo 10 thŭn hŏng anei, ƀiădah dŭm bruă mă grăp gruê ti anôk bruă mdrao mgŭn kdriêk Ea Kar mdê sơnăk hŏng klei mă bruă ti sang êa drao jing êjai mrô 1. Ti nei, mnuih ruă dôk bi klah hjan hŏng gŏ sang. Hlăm sang êa drao knŏng mâo mă mnuih ruă hŏng êa mdrao, kyuanăn, bruă klam mơ̆ng nai mdrao, êa mdrao ti sang êa drao jing êjai amâo djŏ knŏng mdrao mgŭn, đru dŏng mnuih ruă, ƀiădah lŏ kriê dlăng, đru kơ diñu mơ̆ng bruă điêt hĭn. Leh jih mmông mă bruă, grăp čô mnei hlăm êa hŏ hang kyua čŭt hơô kdrăp răng mgang bŏ 7 mmông. Sơnăn ƀiădah, grăp mnĭt mmông mâo mdei, klei ênguôt kơ pưk sang, hnĭng kơ anak 5 thŭn lŏ đĭ hlăm ai tiê. Giăm 2 mlan kbưi hŏng pưk sang, klei blŭ hrăm mơ̆ng amĭ hŏng anak knŏng knang mă kơ đĭng blŭ thâo mĭn đuč: “Dŭm blư̆ blŭ hŏng anak hlăm êlan đĭng blŭ, kâo hnĭng kơ ñu êdi, ñu dôk điêt ƀiădah thâo mđĭ ai kâo gĭr ngă bruă jăk, dôk ti sang khădah ênguôt kơ amĭ ƀiădah mâo ama dôk mbĭt nanao, hmư anak lač sơnăn kâo ăt ƀuh klei hơĭt hlăm ai tiê leh anăn grăp hruê kâo hmăng hmưi dưi hnưm msưh kdŭn klei ruă tưp Covid-19, hnưm dưi wĭt hŏng gŏ sang.”

Nai mdrao Trần Thị Quế, knuă druh klăm bruă ksiêm dlăng kman ti sang êa drao jing êjai mrô 1 brei thâo: Nai mdrao H’Wi jing sa čô mâo bruă klam hlăm klei ngă bruă, mâo nanao klei uêñ mĭn, kriê dlăng kơ mnuih ruă, leh anăn amai lŏ jing sa čô kăp mblang klei blŭ mơ̆ng phung ruă jing mnuih djuê ƀiă hŏng phung êa mdrao, nai mdrao hlăm sang êa drao. Hluê si amai Trần Thị Quế, klei amâo thâo săng klei blŭ jing klei êgun kpăk hlăm bruă mdrao mgŭn kơ mnuih ruă, leh anăn klei anăn dưi ruh mgaih kyua mâo amai msĕ si nai mdrao H’Wi: “Ti nei hmei drông jum lu mnuih djuê ƀiă khua thŭn, diñu amâo thâo klei yuăn jing lu êdi, kyua mâo amai H’Wi pô dưi thâo săng tal êlâo jing si ngă klei ruă tưp, tal dua jing klei hdĭp, klei hmăng hmưi mơ̆ng diñu čiăng pô thâo bĭt êlan mđĭ ai diñu.

Hruê wĭt ngă bruă jing nai mdrao, H’Wi leh anăn phung mă bruă ti sang êa drao jing êjai mrô 1 ka thâo êlâo ôh, êjai bruă mă dôk lu êdi, ênoh mnuih ruă ka hrŏ lu mơh. Dưm hĕ klei ênguôt hnĭng sa anôk, amai ăt dôk gĭr ktưn grăp hruê hŏng bruă pô, ƀrư̆ hruê ƀrư̆ dleh hĭn, kyua bruă klam pô hŏng klei hdĭp mnuih ruă dôk gĭr ktưn sua wĭt klei hdĭp suiah pral hlăm klei bi mblah anei.