VOV4.Êđê- Hruê anei, khădah dôk ti ya anôk, arăng čiăng wĭt bi kuh kŭm ênŭm ênap s’aĭ hŏng gŏ sang, ƀuôn sang, čiăng hrăm mbĭt kah mbha, bi yăl dliê dŭm klei mâo, m’ak amâo dah ênguôt hlăm klei hdĭp, mơ̆ng anăn mâo klei čang hmăng lŏ dơ̆ng kpưn đĭ. Mnuih ƀuôn sang ti ƀuôn Kna A, să Čư̆ Mgar, Dak Lak ăt snăn, m’ak drông Têt hŏng klei m’ak, trei mđao lehanăn ăt mđĭ klei thâo săng hlăm hdră gang mkhư̆ klei ruă Covid 19.

Tŭ mă mnơ̆ng tết phung mâo klei kmah mđup brei amai H’Blĭng Êban, amĭ Phi, ti ƀuôn Kna A, să Čư̆ Mgar, kdriêk Čư̆ Mgar, čar Daklak bŏ hŏng klei mơak. Ñu yăl dliê, gŏ sang ñu dôk hlăm ênoh gŏ êsei ƀun, snăn kreh tŭ mă nanao mnơ̆ng bi đru, mâo bruă sang čư̆ êa đru jêñ jêñ hlăm lu thŭn êgao. Thŭn anei, mnơ̆ng đru mâo tŭ mă hlăm dŭm hrue giăm tết, jing mnơ̆ng yua guah tlam, lehanăn ƀêñ kĕo knư̆ hĭn mơh jing yuôm bhăn, kyuadah ñu mrâo găn hlăm klei bi ktlah leh mdrao covid 19. Ka mâo mprăp ôh djăp mta mnơ̆ng kơ gưl tết nguyên đán:

“Gŏ sang kâo mâo tŭ mă mnơ̆ng đru anei jing ƀêñ kĕo, kâo mơak snăk, lehanăn mâo klei lač jăk kơ dŭm êpul dhar bruă lehanăn bruă sang čư̆ êa mđing uêñ. Snăn hlăm thŭn mrâo ăt čang hmăng jih jang mnuih mâo klei thâo răng kơ klei suaih pral pô, êrô êbat mâo klei răng, čiăng dưi răng kriê klei suaih pral”.

Kbưi hŏng sang amĭ Phi dua tlâo boh sang, jing gŏ sang H’Pil Êban (Amĭ H’Nen), ti ƀuôn Kana A ăt dôk đŭng điŏ drông thŭn mrâo. Mơ̆ng tlam hrue 28 tết mtam, phung amai adei hlăm sang bi ngi mnuih nao mă hla mtei, mnuih tram braih điŏ, mnuih dôk blah mnŭng pioh đŭng điŏ. Amĭ Nen lač, ngă msĕ snei mưng mơ̆ng sui leh. Khădah găn klei ruă tưp Covid 19 ngă kơ lu phung ayŏng amai adei nao mă bruă kbưi amâo mâo dưi wĭt drông tết kơ sang ênŭm ênăp găp djuê ôh, ƀiădah gŏ sang pô ăt ngă klei đŭng điŏ mơh čiăng drông thŭn bhang mrâo.

“Hlăm sang bi đŭng mơh điŏ. Blei braih điŏ, êtak mtak lehanăn jih jang dôk bi đŭng lehanăn riă jih mlam. Pătdah klei anăn jing mưng leh mơ̆ng sui, grăp thŭn ăt msĕ snăn, čiăng kruak knăl kơ sa thŭn, amâo mâo uêñ kơ tết anăn jing prŏng amâodah điêt ôh”.

Ƀuôn Kana mrâo lŏ wĭt msĕ si aguah tlam mrâo êbeh 1 hrue kăm hŏng anei. Êlâo anăn jih sa boh ƀuôn tuôm hŏng klei kwang dar kăm mkhư̆ leh mâo truh 117 čô mnuih djŏ covid 19 amâo mâo thâo mơ̆ng bi mtưp. Jih ƀuôn mâo êbeh 200 boh sang hŏng giăm 1 êbâo čô mnuih ngă klei bi ktlah djŏ hŏng mta mtrŭn. Bruă sang čư̆ êa, lehanăn dhar bruă mdrao mgŭn hŏng klei mjêč tui duah ngă klei mkă dlăng kman hrui mdrao F0, lehanăn tui duah F1 kñăm čiăng pral dưi mkhư̆ klei ruă tưp. Leh êbeh 1 hrue kăm kwang dar kăm mkhư̆, klei hdĭp ƀuôn sang lŏ wĭt msĕ si hđăp hlăm dŭm hrue giăm tết nguyên đán Nhâm Dần. Găn leh dŭm hrue dôk hlăm klei kwang dar, phung ƀuôn sang thâo săng hĭn hlăm bruă hlue ngă bruă mdrơ̆ng hŏng klei ruă tưp. Y –Grin Knul, ti ƀuôn Kana, să Čư̆ Mgar, kdriêk Čư̆ Mgar lač:

“Thŭn anei amâo mâo dưi mkŏ mjing ƀơ̆ng tết prŏng ôh, ăt duah dôk bi ngi lu mnuih rei, knŏng wĭr wĭr hlăm găp djuê đuič, amâo mâo lu msĕ si dŭm thŭn êlâo ôh. Khădah thŭn anei bruă sang čư̆ êa mjing leh djăp klei găl kơ phung ƀuôn sang đuĕ hiu čhưn, ƀiădah grăp čô mnuih mâo mơh klei bi răng kơ asei mlei pô, kbiă hiu kơ êngao bi truă čhiăm guôm ƀô̆, lehanăn amâo mâo dôk bi ngi lu mnuih ôh”.

Tui si Nguyễn Quang Giáp kreh iêo jing Ama Hà, k’iăng khua knơ̆ng bruă sang čư̆ êa să Čư̆ Mgar, hlăm dŭm hrue knhal jih thŭn 2021, să Čư̆ Mgar mâo êbeh 300 čô mnuih djŏ klei ruă tưp Covid 19, bi kwang dar kăm mkhư̆ dua boh ƀuôn pioh mdrơ̆ng hŏng klei ruă tưp. Čiăng kơ phung ƀuôn sang hơĭt ai tiê nga klei bi ktlah, bruă sang čư̆ êa alŭ wăl tiŏ nao leh mnuih nao đru phung ƀuôn sang dlăng kriê mnơ̆ng rông, hrui pĕ boh kphê. Mtrŭ mjhar bruă bi đru mnơ̆ng ƀơ̆ng huă, djam mtam lehanăn mnơ̆ng yua aguah tlam kơ phung ƀuôn sang. Hŏng klei bi mguôp, klei sa ai mơ̆ng jih jang bruă kđi čar, klei ruă tưp ti să pral dưi gang mkhư̆ jih. Čiăng lŏ dơ̆ng đru kơ phung ƀuôn sang mơak yan mnga, drông tết, mbĭt hŏng bruă hâo hưn kơ bruă mdrơ̆ng hŏng klei ruă tưp, bruă sang čư̆ êa alŭ wăl lŏ dơ̆ng iêo jak dŭm klei bi đru hiu mđup brei mnơ̆ng kơ dŭm gŏ êsei lĕ hlăm klei dleh dlan, gŏ êsei ƀun hlăm să. Ama Hà lač:

“Bruă Đảng, lehanăn knơ̆ng bruă sang čư̆ êa, bruă mặt trận lehanăn jih jang êpul êya bi iêo mthưr klei bi đru mơ̆ng phung mâo ai tiê kmah đru brei kơ phung ƀuôn sang drông tết hŏng klei djăp ênŭm hĭn. Mtrŭt mjhar dŭm boh ƀuôn nga klei mjĕ mjing hrăm mbĭt bi đru kơ phung ƀuôn sang, boh nik jing dua boh ƀuôn tuôm hŏng klei ruă tưp jing ƀuôn Kana A lehanăn ƀuôn Bling čiăng kơ digơ̆ drông thŭn mrâo h’uh mđao”.

Găn leh klei dleh dlan kyua klei ruă tưp, phung ƀuôn sang dŭm boh ƀuôn ti să Čư̆ Mgar ăt hlăk hơ̆k mơak drông sa yan mnga mrâo. Khădah mâo tlŏ ênŭm leh vaccine, ƀiădah grăp čô mnuih ăt mâo klei thâo răng, lehanăn hlue ngă djŏ klei bhiăn knŭk kna mdrơ̆ng hŏng klei ruă tưp čiăng dưi mâo klei êđăp ênang kơ asei mlei pô lehanăn kơ gŏ sang. Kyuanăn mbĭt hŏưng mơak drông yan mnga mrâo, grăp čô phung ƀuôn sang ăt čŏng hlue gưt kjăp dŭm mta mtrŭn, ngă bi ênŭm 5 mta klei mtă čiăng kơ dŭm hrue yan mnga klă sĭt jing hrue mơak lehanăn êđăp ênang, klei ruă tưp pral dưi msưh kdŭn hlăm thŭn mrâo./.

Pô mblang: Y-Khem Niê