VOV4.Êđê - Ti alŭ wăl Lăn Dap Kngư, klei ruă tưp Covid 19 hlăk đĭ lar pral ti čar Daklak lehanăn čar Lâm Đồng. Tui si anôk bruă ksiêm dlăng klei ruă čar Daklak truh 4h tlam mbrue (21/2), kluôm čar mâo truh 988 čô mnuih djŏ klei ruă tưp Covid 19 mrâo lehanăn 3 čô mnuih djiê. Yap hlăm sa hrue kăm kơ anei, Daklak mâo ênoh mnuih tưp djŏ lu hĭn, truh 4 êbâo 145 čô mnuih. Jih jang sang hră mơ̆ng hđeh điêt truh kơ gưl sa mơ̆ng adŭ 1 truh adŭ 6, brei mdei êjai klei nao hriăm ti sang hră, lŏ wĭt hriăm hŏng online lehanăn dŭm hdră mtô bi hriăm mkăn.

Ti Lâm Đồng, klei ruă tưp anei ăt đĭ lu, hŏng ênoh 32 êbâo 364 čô mnuih djŏ hlăm hrue kăm êgao, hlăm hrue mbrue (21/2) lŏ mâo 3 čô mnuih djiê. Knơ̆ng bruă mdrao mgŭn Lâm Đồng, mâo leh hră mtrŭn truh kơ sang êa drao dŭm boh kdriêk, ƀuôn prŏng hlăm čar kăp đru kčĕ kơ knơ̆ng bruă sang čư̆ êa pŏk ngă mtam êpul bruă hiu mdrao mgŭn, mkŏ mjing êpul nai aê mdrao đru dlăng kriê mnuih ruă hlăm yang ƀuôn, čiăng bi mguôp hŏng dhar bruă mdrao mgŭn dlăng kriê mdrao mgŭn bi jăk mnuih ruă tưp./.

Y-Khem pô mblang