VOV4.Êđê - Tui ngă klei gĭt gai, mtô lač mơ̆ng phŭn bruă mdrao mgŭn leh anăn bruă sang čư êa čar kơ bruă mđĭ hĭn klei tlŏ mgang vaccine Abdala gang mkhư̆ klei ruă tưp Covid-19, knơ̆ng bruă mdrao mgŭn čar Kon Tum brei thâo srăng bi leh bruă tlŏ mgang vaccine anei kơ mnuih ƀuôn sang hlăm mlan 2 thŭn 2022.

Čiăng dưi ngă bruă klam anei, hruê mbruê 9/2, knơ̆ng bruă mdrao mgŭn mâo leh hră mơĭt kơ anôk bruă ksiêm dlăng klei ruă tưp leh anăn anôk bruă mdrao mgŭn 10 kdriêk, ƀuôn prŏng hlăm čar, mtă brei mđĭ hĭn bruă tlŏ mgang vaccine Abdala gang mkhư̆ klei ruă tưp Covid-19 kơ mnuih ƀuôn sang. Klei hâo hưn mơ̆ng phŭn bruă mdrao mgŭn čar Kon Tum brei ƀuh, yap truh kơ hruê 7/2/2022 knơ̆ng bruă mdrao mgŭn alŭ wăl ngă leh bruă tlŏ mgang 27.956 hnơ̆ng vaccine Abdala hlăm ênoh 45.000 hnơ̆ng vaccine dưi mkăp brei leh anăn hnơ̆ng mâo tlŏ ênŭm 2 aruăt mơ̆ng vaccine Abdala knŏng mâo mă 61%. Ară anei, ênoh hnơ̆ng vaccine Abdala dôk ka tlŏ ti čar Kon Tum jing 13.890 hnơ̆ng.

Y-Ƀel pô mblang