VOV4.Êđê - Ară anei, anôk bruă mdrao mgŭn hlăm kluôm ala dôk mjêč tlŏ mgang vaccine kñăm mđing truh kơ hdră mâo djăp ai bi kdơ̆ng hŏng klei ruă hlăm êpul êya yang ƀuôn hŏng klei ruă Covid 19. Mbĭt anăn, bruă mdrao F0 ti sang hŏng mnuih ruă mâo klei bi êdah hdjul ba wĭt leh klei tŭ dưn, ƀrư̆ ƀrư̆ lŏ wĭt hŏng klei hdĭp aguah tlam.

Ti anăp boh klei ênoh mnuih ruă Covid-19 hlăm êpul êya đĭ lu, ƀuôn prŏng Đà Nẵng gĭt gai mđĭ ktang bruă pŏk ngă anôk êrô hiu tlŏ vaccin ti alŭ wăl čiăng hmao kriê dlăng, mdrao tŭ dưn phung F0 ti sang. Mơ̆ng anăn, bi hrŏ klei kpĭ kơ dŭm anôk mdrao mgŭn hlăm bruă mdrao mgŭn leh anăn kriê dlăng mnuih ruă. Ƀuôn hgŭm Thanh Khê Tây, kdriêk čar Thanh Khê jing sa hlăm lu alŭ wăl ti ƀuôn prŏng Đà Nẵng pŏk ngă anôk mdrao mgŭn êrô hiu mdrao F0 ti sang. Anôk mdrao mgŭn mơ̆ng ƀuôn hgŭm dôk đru mdrao 147 čô F0 ti sang, truh ară anei giăm 50 čô hlao leh. Aê mdrao Đỗ Văn Đô - Khua anôk bruă mdrao mgŭn êrô hiu ƀuôn hgŭm Thanh Khê Tây brei thâo, bruă phung mdrao mgŭn grăp hruê ti Anôk bruă mdrao mgŭn jing kriê dlăng anăn phung F0 hluê si êpul phung ruă. Knuă druh bi blŭ hrăm nanao hŏng mnuih ruă Covid-19 hlăm đĭng blŭ čiăng thâo kơ boh klei suaih pral leh anăn ktrâo lač mdrao mgŭn sĭt čiăng thâo:“Mâo mnuih ruă ƀiădah klei bi knăl jing ruă đah da amâodah ruă tian, mâo klei ruă mkăn snăn kâo srăng nao ksiêm mkă kơ phung ruă snăk. Knhal jih tlam, kâo srăng čih anăn jih jang phung ka nao ksiêm mkă čiăng thâo ya klei lŏ čiăng ngă.”

Ti kdriêk čar Sơn Trà, ƀuôn prŏng Đà Nẵng grăp hruê mâo giăm 200 čô F0. Dŭm anôk mdrao mgŭn êrô hiu mơ̆ng 7 ƀuôn hgŭm ti alŭ wăl ba yua leh, đru kơ Anôk bruă gĭt gai gang mkhư̆ klei ruă tưp mơ̆ng kdriêk čar kriê dlăng, ktuê dlăng bruă mdrao phung F0 ti sang jăk hĭn. Grăp anôk mdrao mgŭn êrô hiu dưi mprăp dua jhưng đih, mâo hip êa drao, čhiăm guôm ƀô̆, masin mkă hnơ̆ng êrah… leh anăn dŭm mta pioh kơ bruă ksiêm mkă. Huỳnh Văn Hùng, K’iăng Khua Knơ̆ng bruă sang čư̆ êa kdriêk čar Sơn Trà, ƀuôn prŏng Đà Nẵng brei thâo, kyua êpul bruă mdrao mgŭn ƀiă anăn alŭ wăl lŏ iêô jak thiăm êpul bruă mdrao mgŭn jih thŭn mă bruă, phung čŏng ngă bruă hgŭm đru kơ dŭm anôk mdrao mgŭn êrô hiu: Knơ̆ng bruă sang čư̆ êa dŭm ƀuôn hgŭm iêô leh phung mă bruă ăt msĕ mơh phung čŏng ngă bruă anei hgŭm mbĭt. Truh ară anei, hŏng ênoh mdrao F0 ti sang ti kdriêk čar êbeh 1.600 čô. Klei tŭ truh ară anei ăt hơĭt kjăp. Dŭm bruă kčĕ ăt msĕ mơh msir mgaih dŭm klei akâo, êmuh hrăm phung ruă dưi hmao ngă.”

Ară anei, ƀuôn prŏng Đà Nẵng mâo giăm 30 anôk bruă mdrao mgŭn êrô hiu dưi mkŏ mjing leh anăn ngă bruă. Hluê si klei ksiêm dlăng, dŭm anôk bruă mdrao mgŭn êrô hiu anei mphŭn mđĭ lar klei tŭ dưn, đru bi hrŏ kơ dŭm anôk mdrao mgŭn, kriê dlăng leh anăn mdrao tŭ dưn F0 mâo klei bi knăl hdjul.

Hluê si khua phŭn bruă mdrao mgŭn Nguyễn Thanh Long, bruă mdrao kơ phung ruă Covid-19 ti ala čar drei mkŏ mjing jăk. Ênoh mnuih djiê ƀrư̆ hruê ƀrư̆ hrŏ. Hluê ngă Hdră mtrŭn 128 mơ̆ng Knŭk kna kơ klei mdrơ̆ng êđăp ênang, mbruă, ktuê dlăng tŭ dưn klei ruă Covid-19, Phŭn bruă mdrao mgŭn bi mlih jing hdră kriê dlăng klei amâo jăk bi djŏ guôp hŏng hdră mbĭt mdrơ̆ng hŏng klei ruă tưp dlông rŏng lăn. Boh nik, leh mâo hdră mtrŭn čiăng F0 hnơ̆ng hdjul dưi mdrao ti sang, kdrăp ksiêm mkă mdrao mgŭn dưi bi hrŏ, mâo klei găl čiăng hluê ngă hdră bi hrŏ ênoh mnuih ruă truh kơ djiê. “Yuôm bhăn hĭn ară anei jing drei tlŏ leh vaccin lu, jing 1 hlăm dŭm ala čar dôk mrô sa dlông rŏng lăn kơ bruă tlŏ vaccin. Khădah hmei ăt bi mklă, vaccin jing sa kliăng phŭn čiăng ba klei hdĭp lŏ wĭt msĕ aguah tlam, mbĭt hŏng dŭm hdră msir mdrao mgŭn. Kyua anăn, Phŭn bruă mdrao mgŭn hưn leh hŏng Knŭk kna, Khua knŭk kna pŏk ngă hdră tlŏ vaccin yan Mnga leh anăn tlŏ wăt hlăm hruê Tết, amâo mâo ôh hruê mdei leh anăn tlŏ kơ jih jang mnuih sĭt truh hruê tlŏ. Hŏng phung wĭt kơ ƀuôn sang ƀơ̆ng Tết dưi čih anăn tlŏ ti dŭm alŭ wăl anăn”.

Phŭn bruă mdrao mgŭn rơ̆ng djăp vaccin gang mkhư̆ Covid-19 čiăng tlŏ kơ mnuih ƀuôn sang. Bruă tlŏ vaccin amâo djŏ jing mgô̆ ôh ƀiădah brei hưn hŏng jih jang mnuih ƀuh klei tŭ dưn mơ̆ng bruă tlŏ mgang. Boh sĭt bi mklă mâo truh 80% phung ruă Covid-19 djiê hlăm wưng êgao jing amâo tlŏ vaccin leh anăn lu jing phung khua thŭn, mâo klei ruă.  Khua phŭn bruă mdrao mgŭn Nguyễn Thanh Long bi mklă Hdră tlŏ mgang yan mnga srăng đru hnưm ba klei hdĭp wĭt msĕ aguah tlam.Drei suăi êmăn leh giăm 2 thŭn êgao leh anăn boh tŭ drei ba jing prŏng prĭn. Hmei ăt bi mni kơ dŭm gŏ sang mơ̆ng phung knuă druh mdrao mgŭn mđing dlăng, jing anôk knang čiăng kơ knuă druh mdrao mgŭn hơĭt ai tiê mă bruă. Hmei ăt bi mni lač jăk kơ mnuih ƀuôn sang mâo dŭm klei bi hgŭm, đru, hrăm mbĭt hŏng bruă mdrao mgŭn leh anăn jih bruă kđi čar hrăm mbĭt hŏng bruă mdrao mgŭn ktuê dlăng klei ruă tưp. Ƀri gưl thŭn mrâo mơĭt klei hơêč hmưi kơ jih êpul mdrao mgŭn sa thŭn mrâo suaih pral, jăk mơak leh anăn lŏ dơ̆ng mâo lu klei tŭ dưn leh anăn klei yuôm bhăn hĭn jing hnưm ktuê dlăng klei ruă tưp, hnưm ba klei hdĭp lŏ wĭt msĕ aguah tlam čiăng kƀĭn mđĭ kyar bruă duh mkra- ala ƀuôn”./.