VOV4.Êđê - Ti anôk Lăn Dap Kngư mkŏ hŏng dŭm čar nah Dhŭng - anôk klei ruă Covid-19 mlih mâo thŭn 2021, ƀiădah čar Dak Nông hluê ngă jăk dŭm hdră gang mkhư̆ klei ruă tưp. Dak Nông jing sa hlăm 2 čar mâo ênoh mnuih ruă Covid-19 ƀiă hĭn ti Lăn Dap Kngư, ênoh mnuih djiê hlăm êpul ƀiă êdi kluôm ala. Klei tŭ dưn anăn jing kyua klei hrăm mbĭt sa ai tiê mơ̆ng mnuih ƀuôn sang leh anăn jih bruă kđi čar, hlăm anăn mâo wăt phung knuă druh mdrao mgŭn anôk phŭn mdrơ̆ng hŏng klei ruă tưp. Diñu lui êjai klei pô čiăng čiăng tuh êyuh jih ai tiê đru gang mkhư̆ klei ruă tưp tŭ dưn ti Daknông, sa čar dôk mâo lu klei dleh dlan ti Lăn Dap Kngư.

Mơ̆ng mlan 7/2021, leh klei ruă tưp Covid-19 bluh đĭ ti čar Dak Nông truh kơ ară anei, nai mdrao Bùi Thị Tuyết mbĭt hŏng phung knuă druh mă mta ksiêm mkă kman yang ƀuôn, anôk bruă ksiêm dlăng klei ruă tưp čar Dak Nông, pătdah ka mâo ôh sa hruê mdei. Amai brei thâo, mâo đa đa krah mlam hmư̆ arăng iêo hŏng đĭng ƀlŭ lŏ mprăp nao mtam. Mâo lu hruê amai ngă bruă mă mta ksiêm mkă kmam jih mlam čiăng hmao đru kơ bruă tui duah, čuăl krĭng leh anăn mkhư̆ klei ruă tưp. Jih sa hruê mă bruă hŏng kdrăp čŭt hơô bruă mdrao mgŭn hlơr, mâo đa đa phung mă bruă mbĭt hŏng amai tơl ruă asei mlei. Nai mdrao Bùi Thị Tuyết yal dliê:Mâo blư̆ ăt mâo klei ênguôt hlăm ai tiê kyua pô mâo anak điêt, mâo gŏ sang msĕ hŏng arăng mkăn. Ƀiădah kyua bruă kñăm mbĭt, kyua klei ruă tưp dleh dưi ksiêm dlăng, kâo ăt msĕ hŏng grăp čô hlăm êpul ngă bruă mâo nanao klei gĭr ktưn čiăng đru dưi mkhư̆ klei ruă tưp. Ăt hmăng hmưi jih jang mâo tết êđăp ênang leh anăn bi hgŭm hŏng gŏ sang, grăp čô ngă djŏ 5 klei mtă mơ̆ng phŭn bruă mdrao mgŭn leh anăn mâo nanao klei răng, amâo dưi ngă ngơi mang.

Ti anôk bruă ksiêm mkă kman – anôk bruă ksiêm dlăng klei ruă tưp čar Dak Nông, hlăm dŭm mlan êgao, 19 čô knuă druh wơr hĕ êjai gŏ sang pô čiăng jih ai hŏng bruă mă. Thạc sỹ Nguyễn Phước Phúc, khua kiă kriê anôk ksiêm mkă kman brei thâo:Si ngă srăng ngă čiăng rơ̆ng klei ksiêm mkă kman mơ̆ng 2 êbâo truh kơ 3 êbâo mta ksiêm mkă, knar hŏng hlăm brô 7 êbâo truh kơ 10 čô dưi mă mta ksiêm mkă kman hlăm grăp hruê, lu ayŏng amai adei hlăm anôk bruă lui jih bruă hlăm pưk sang pô leh anăn dôk mă bruă ti nei 24/24. Leh anăn mâo dŭm hruê hmei mă bruă jih mlam čiăng dưi rơ̆ng bruă gang mkhư̆ klei ruă tưp hlăm alŭ wăl, boh nik hlăm dŭm gưl bluh đĭ hŏng ênoh mnuih ruă lu ti Gia Nghĩa, Krông Knô, Dak Mĭl, Čư̆ Jŭt hlăm hruê mmông êgao.

Mrâo wĭt leh 2 mlan nao gang mkhư̆ klei ruă tưp Covid-19 ti sang êa drao prŏng Chợ Rẫy – ƀuôn prŏng Hồ Chí Minh, aê mdrao mda asei Lê Văn Thương lŏ čŏng pô nao mă bruă ti anôk mdrao klei ruă tưp Covid-19 kơ phung ruă kjham, sang êa drao prŏng čar Dak Nông. Amâo čiăng yal dliê lu ôh kơ asei pô, ayŏng brei thâo dôk ba jao klei ngă bruă kar êrah kơ phung ngă bruă mbĭt hŏng klei hmăng hmưi dưi krơ̆ng klei hdĭp kơ lu phung mnuih ruă kjham:Gĭr hŏng jih ai pô, lui hĕ bruă pô ti tluôn čiăng ngă bruă gang mkhư̆ klei ruă tưp, kyuanăn ai tiê jing lu êdi. Leh wĭt mơ̆ng sang êa drao Chợ Rẫy kâo ƀuh sa klei jing phung mâo klei ruă tưp Covid-19 kjham tơdah dưi kar êrah nanao leh anăn hnưm srăng dưi hlao lu hĭn leh anăn bi hrŏ hnơ̆ng truh klei djiê. Klei năng mơak jing phung ayŏng adei mơ̆ng dŭm anôk mdrao amâo djŏ thơ̆ng kơ bruă ƀiădah diñu ăt tui hriăm leh anăn thâo ngă jăk, dưi bi hrŏ klei ktrŏ kơ pô.

Ti ƀăng mŭt kbiă dhŭng krĭng Lăn Dăp Kngư, hlăm êbeh 1 thŭn êgao, čar Dak Nông ksiêm dlăng nanao kơ klei hyưt bluh đĭ klei ruă tưp Covid-19. Khădah sơnăn, kčưm hlăm thŭn 2022, êdei kơ čar Kon Tum, Dak Nông jing alŭ wăl mâo ênoh mnuih mâo klei ruă tưp Covid-19 ƀiă hĭn tal 2 ti alŭ wăl krĭng Lăn Dăp Kngư. Hlăm anăn, hnơ̆ng mnuih djiê ti čar hlăm brô 0,25%, dôk hlăm êpul ƀiă hĭn hlăm kluôm ala. Čih yap kơ bruă gang mkhư̆ klei ruă tưp Covid-19 ti alŭ wăl Ngô Thanh Danh, khua bruă Đảng čar Dak Nông brei thâo, čar Dak Nông dưi ksiêm dlăng klei ruă tưp kyua mâo klei bi mguôp, klei sa ai mơ̆ng mnuih ƀuôn sang hŏng klei nao hgŭm, gĭt gai ktang phĭt mơ̆ng bruă kđi čar, boh nik jing phung ba anăp gang mkhư̆ klei ruă tưp:Hmei mâo klei bi klă mơ̆ng êlâo jing sa čar ƀun ƀin, dleh dlan hlăm djăp mta bruă, wăt kơ mnơ̆ng yua, bruă mdrao mgŭn ăt dôk kƀah lu, kyuanăn srăng čŏng ngă bruă hŏng djăp hdră jing kwang dar, mkhư̆ klei ruă tưp ktang hmar, ktang jăk, tơdah lui leh klei ruă tưp bluh đĭ pô amâo lŏ dưi ôh. Hlăm dŭm klei suăi êmăn, dleh dlan, phung ruă knap mñai leh, phung nao gang mkhư̆ klei ruă tưp ăt suăi êmăn hĭn, lui jih bruă pô čiăng ngă bruă mbĭt, anăn jing bruă jăk siam êdi.

Tết hriê, yan mnga truh, êjai grăp čô dôk hơ̆k mơak hlăm thŭn bhang mrâo, mbĭt hŏng êpul ba anăp bruă gang mkhư̆ klei ruă tưp, phung knuă druh ăt dôk guiñ guiñ jih ai hlăm drăp čŭt hơô mdrao mgŭn hlơr hĭp, lui hĕ klei ênguôt pô, jih ai ngă bruă mă mta ksiêm mkă, tui duah, mdrao kơ mnuih ruă… đru rơ̆ng klei êđăp ênang kơ mnuih ƀuôn sang drông tết, hdĭp êđăp ênang, hŏng klei mbruă ti anăp klei ruă tưp Covid-19.