VOV4.Êđê - Ară anei, dŭm alŭ wăl hlăm kluôm ala brei leh hđeh sang hră nao hriăm ti sang, wăt phung hđeh ti gưl thŭn nao sang hră dưi tlŏ vaccin Covid-19 leh anăn phung hđeh ka dưi tlŏ vaccin. Hlăm boh klei Covid-19 lŏ dơ̆ng dleh ktuê dlăng, anôk bruă djŏ tuôm kčah leh dŭm hdră mdrơ̆ng klă klơ̆ng kơ djăp boh klei ƀuh F0 hlăm sang hră leh anăn brei mprăp hdră mdrao mgŭn kơ hđeh sang hră djŏ Covid-19.

Khădah ênoh hđeh djŏ Covid 19, ênoh mnuih ruă ktrŏ ƀiă khă snăn ăt mâo mnuih djiê hlăk ênoh mnuih ruă lu đei. Leh phung hđeh lŏ nao sang hră, đăo tĭng ênoh phung hđeh djŏ Covid 19 srăng đĭ lu. Kyua anăn, phung thơ̆ng kơ bruă mñă klă kơ hdră gang mkhư̆ klei ruă tưp lehanăn amâo lui mâo lu phung hđeh djŏ klei ruă sa blư̆, kyua dŭm mta êa drao mdrao Covid 19 amâo brei yua kơ phung hđeh ôh. Khua sang êa drao mdrao klei ruă phung hđeh gưl dlông Trần Minh Điển lač snei, si srăng ngă čiăng rơ̆ng klei êđăp ênang kơ phung hđeh nao sang hră mâo lu kdrêč, hlăm anăn anôk bruă sang hră m’ar mtô bi hriăm, bruă sang čư̆ êa lehanăn anôk bruă mdrao mgŭn alŭ wăl čih mkra hdră mdrơ̆ng êđăp ênang ti sang hră. Mbĭt anăn, phung amĭ ama brei mprăp kơ anak pô mbĭt hŏng sang hră ktrâo lač kơ anak hluê ngă kjăp hdră gang mkhư̆ klei ruă tưp, boh nik hluê ngă kjăp “5 Asăp mtă”. Tơdah mâo klei đing amâo dah djŏ kman Sar CoV2 hlăm adŭ hriăm, sang hră bi hgŭm mtam hŏng anôk bruă mdrao mgŭn hưn mthâo kơ gŏ sang kñăm tui ksiêm klei bi tuôm, anôk nao mơ̆ng hđeh ruă anăn:“Brei brei tui ksiêm kjăp ti adŭ hriăm anăn đuič lehanăn năng ai knŏng dŭm boh jhưng dôk giăm hđeh anăn, dŭm krĭng anôk hđeh anăn hlăp lêñ đuič amâo djŏ drei khut khat hlŏng kđăl ƀăng sang hră amâo dah adŭ anăn amâo lŏ hriăm. Klei lač sang hră êđăp ênang tăp năng amâo djŏ jing “zero Covid” ƀiădah klei anei čiăng lač sang hră êđăp ênang jing drei čih mkra hdră kčah, brei drei pral tui ksiêm, drei čuăl krĭng anăn snăn srăng rơ̆ng sang hră anăn mâo klei êđăp ênang”.

Tơdah mâo hđeh djŏ Covid 19, phung amĭ ama brei ênang ai tiê, amâo huĭ hyưt, rŭng răng ôh. Phung anak čô dôk ti sang, amĭ ama brei ksiêm dlăng dŭm klei bi knăl, dŭm klei bi êdah čiăng đru lehanăn hưn mthâo kơ anôk bruă mdrao mgŭn čiăng dưi dŏng mdrao pral, ba wĭt klei tŭ dưn. Khua sang êa drao mdrao klei ruă phung hđeh gưl dlông Trần Minh Điển mtă snei:Anei jing sa klei ruă tưp, kyua anăn hdră bi ktlah ăt yuôm bhăn mơh. Tơdah drei amâo bi ktlah phung anak snăn huĭ srăng tưp lar kơ phung hđeh điêt hĭn, lehanăn amĭ ama, aduôn aê, boh nik phung mniê dôk ba tian. Kyua anăn, hlăm djăp klei mâo, grăp gŏ sang brei h’ĭt ai tiê ksiêm dlăng lehanăn hluê ngă klei ktrâo lač mơ̆ng anôk bruă mdrao mgŭn kơ hdră dŏng mdrao ti sang, si bĕ ngă lehanăn si klei bi êdah huĭ đĭ kơ ktrŏ, tơdah ktrŏ brei drei nao mtam ti sang êa drao lehanăn dŏng mdrao mtam, kñăm rơ̆ng klei êđăp ênang kơ phung hđeh”.

Ti anôk bi kƀĭn mrâo anei kơ hdră mdrao phung hđeh djŏ klei ruă Covid 19, K’iăng khua knŭk kna Vũ Đức Đam jao kơ Phŭn bruă mdrao mgŭn gĭt gai, bi hgŭm hŏng Phŭn bruă Sang hră m’ar mtô bi hriăm lehanăn anôk bruă djŏ tuôm čih mkra hdră kčah hŏng grăp boh klei mâo tơdah phung hđeh lŏ nao sang hră, mâo hđeh djŏ Covid 19. Mbĭt anăn, mjêč ngă leh, ba mdah hră m’ar ktrâo lač thơ̆ng kơ bruă lehanăn hdră mdrao Covid 19 hŏng mnuih gŭ 18 thŭn, boh nik jing hŏng phung hđeh gŭ 12 thŭn./.