VOV4.Êđê - Aguah mbruê (9/8), ti sang bruă khua lăn čar, khua gĭt gai Đảng, khua lăn čar Lào Thongloun Sisoulith lehanăn mô̆ ñu gĭt gai leh klei tŭ drông khua lăn čar Nguyễn Xuân Phúc lehanăn mô̆ ñu hŏng klei kdrăm k’ah ƀri hlăm wưng êpul ngă bruă gưl dlông Việt Nam klă klơ̆ng nao čuă ala čar Lào. Bi ruê̆ klei tŭ drông anăn, 2 čô khua gĭt gai mâo leh klei bi mtuôm êlâo kơ klei blŭ hrăm.

Leh kơ klei blŭ hrăm, 2 čô khua gĭt gai dưi ktuê dlăng knăm bi klă lu hră mơar yuôm bhăn bi mguôp hlăm bruă klei bhiăn ala čar, gang mkhư̆ klei ngă soh ma túy, đru dŏng, bi mklă klei bi mguôp plah wah dŭm alŭ wăl, knơ̆ng bruă mơ̆ng 2 ala čar hlăm bruă pui kmlă, mnơ̆ng dhơ̆ng hlăm gŭ lăn. Hlăm klei nao čuă anei, khua lăn čar Nguyễn Xuân Phúc ăt mâo mmông găl dưi bi mtuôm hŏng khua knŭk kna Lào, khua bruă kƀĭn ala Lào lehanăn dŭm čô khua bruă Đảng, khua knŭk kna ala čar Lào.

Y Khem pô mblang