VOV4.Êđê - Yap truh 6 mmông truh 12 mmông hruê 24-5, Việt Nam lŏ mâo 33 čô mnuih ruă Covid-19, hlăm anăn 28 čô mnuih ti čar Bắc Giang, 4 čô ti Hải Dương leh anăn 1 čô ti Đà Nẵng. 28 čô dưi ƀuh ti hlăm wăl bi ktlah hjăn, djŏ tuôm kơ anôk mâo klei ruă Wăl tuh tia mkra mjing Quảng Châu, Vân Trung, Đình Trám. Yap truh 12 mmông hruê 24-5, Việt Nam mâo jih jang 3.823 čô hlăm ala čar leh anăn 1.485 čô mŭt hlăm ala čar. Hluê si klei hâo hưn mơ̆ng Anôk bruă mdrao mgŭn leh anăn Êpul ksiêm mkă mnuih ruă Covid-19 kjham, yap truh aguah 24-5, Việt Nam dôk mdrao kơ 2.258 čô ruă Covid-19, hlăm anăn êbeh 50% ênoh mnuih ruă amâo mâo ôh klei bi knăl. K’iăng Khua phŭn bruă Nguyễn Trường Sơn bi mklă boh klei ruă Covid-19 hlăm gưl anei mdê hŏng Đà Nẵng. Ti Đà Nẵng, lu phung ruă jing ruă boh ƀleh kjham amâodah mâo klei ruă amâo dưi mdrao sui leh. Khădah hlăm gưl bluh mâo anei, mta mrâo mơ̆ng Ấn Độ, êngao kơ klei tưp lar pral, đa đa phung mda asei, amâo mâo ôh klei ruă hlăm asei mlei ƀiădah mâo klei ruă kjham, dưi đru bi êwa oxi, bi êwa hŏng masin.

H Zawut pô mblang