VOV4.Êđê - Tlam hruê 8/8, ti Hà Nội, Khua knŭk kna Phạm Minh Chính nao leh ti Knăm hưn mthâo hdră bi hgŭm đru kčĕ kơ bruă ksiêm dlăng, mdrao mgŭn klei ruă mơ̆ng kbưi (Teleheath) truh 100% gưl kdriêk lehanăn hưn mthâo Anôk bruă gang mkhư̆, mdrơ̆ng hŏng klei ruă Covid 19 ala čar. Blŭ hrăm ti knăm anei, Khua knŭk kna Phạm Minh Chính mtă kơ Phŭn bruă mdrao mgŭn mâo klei ktrâo lač djŏ guôp, kah mbha jing 5 mta. Tơdah mdrao klei ruă ti sang srăng lŏ mâo sa mta mơh. Klei ruă Covid 19 dôk bluh mâo pral, hdră anei ka tuôm ngă êlâo êdei ôh, kyua anăn gưl anei drei ngă êjai mă klei hriăm êjai. Dŭm phŭn bruă, mâo Phŭn bruă kreh knhâo, kdrăp mrâo; Phŭn bruă hâo hưn mtô mblang srăng bi leh hdră kdrăp ngă bruă. Boh nik brei ksiêm dlăng ti klei ka dưi ngă tơdah ba yua kdrăp anei. Khua knŭk kna bi mni klei tŭ yuôm mơ̆ng bruă anei, đru mguôp hlăm hdră mlih mrâo. Pral dŏng mdrao mnuih ruă, đru kơ anôk bruă mdrao mgŭn lŏ mâo klei thâo hĭn, bi hrŏ klei lu mnuih nao mdrao hlăm gưl dlông./.

H Nêč pô mblang