VOV4.Êđê - Leh mkŏ mjing klei bi kuôl ung mô̆, čiăng bi êdah klei mpŭ, hdơr knga kơ amĭ ama, bi mjĕ mjing  ayŏng adei, ƀĭng găp, mbĭt anăn atăt anak êkei nao dôk ti sang mô̆, mnuih Jrai khăng mkŏ mjing knăm Juă hbâo.

Tui si klei bhiăn mơ̆ng mnuih Jrai, leh ngă klei bi kuôl ung mô̆, êkei srăng dŭ mnơ̆ng dhơ̆ng pô wĭt kơ sang mô̆ yơh. Leh êgao mâo 3 - 7 hruê, phung Jrai kreh mkŏ mjing knăm juă hbâo kpur.

Knăm anei čiăng lač msĕ hŏng klei bi hdơr kơ amĭ pô kkiêng, ama pô ƀă, bi mguôp ayŏng adei lehanăn ƀĭng găp. Mbĭt anăn, anei jing klei nao tăt anak êkei nao dôk ti sang mrâo, bi mguôp jih klei hdĭp hŏng mô̆ anak. Kyuanăn, čiăng bi êdah bruă pô jing anak, 2 čô ung mô̆ mrâo srăng ruah sa hruê hlăm hruê kăm, kreh ruah jing hruê klah čiăng wĭt ti gŏ sang amĭ ama êkei, iêu jak ayŏng adei lehanăn ƀĭng găp nao hgŭm hlăm knăm juă hbâo kpur.

Ayŏng Kpă Vũ ti ƀuôn Toan, să Ia Kdam, kdriêk Ia Pa, čar Gia Lai lač: “Kâo mrâo dôk mô̆ ti ƀuôn čư̆ Ƀah, să Čư̆ Ƀah, wăl krah AYun Pa. leh ngă klei bi kuôl ung mô̆, čiăng bi hdơr bruă ami kkiêng, ama ƀă, rông truh kơ prŏng, bi êdah pô jing sa čô anak lehanăn kbưi hŏng ayŏng adei, ƀĭng găp êlâo kơ klă klơ̆ng wĭt dôk ti sang mô̆, kâo ăt mkŏ mjing knăm juă hbâo kpur.”

Yăng đar, hlăm knăm juă hbâo kpur, anak êkei srăng ba sa čeh kpiê, sa drei ŭn, sa gŏ êsei kơ amĭ ama, sa čeh kpiê, sa drei mnŭ, sa blah añuê kơ phung ƀĭng găp. Dŭm mnơ̆ng anei srăng mă mơ̆ng sang mô̆. Anôk mkŏ mjing knăm juă hbâo kpur anei jing ti sang amĭ ama êkei. Gĭt gai knăm anei jing pô pŏk êlan kơ 2 čô ung mô̆ mrâo. Leh ba dŭm mnơ̆ng anei truh ti sang amĭ ama, anak êkei srăng iêu jăk jih jang ayŏng adei, bĭng găp lehanăn găp djuê hriê mơak mbĭt hŏng gŏ sang mrâo.

Hlăm knăm juă hbâo kpur, dŭm čô hlăm gŏ sang, ayŏng adei, ƀĭng găp srăng dôk mbĭt sa anôk. Leh kơ anăn, anak êkei srăng mâo klei blŭ, bi êdah boh phŭn mkŏ mjing knăm juă hbâo kpur, lehanăn bi êdah klei hdơr knga kơ amĭ ama rông leh truh kơ prŏng. Ăt hlăm knăm anei, ayŏng adei, ƀĭng găp srăng mnăm dŭm kčok kpiê čeh lehanăn bi hdơr dŭm klei tuôm găn leh, mtă mtăn kơ ung mô̆ mrâo dŭm bruă srăng ngă kơ anăp lehanăn hơêč hmưi kơ ung mô̆ mrâo mâo klei hdĭp mơak mñai, trei mđao, thâo bi mguôp, gĭr ngă bruă knuă, mđĭ kyar klei hdĭp mda, lehanăn rông ba anak čô..

Knăm juă hbâo kpur kreh mkŏ mjing điêt lehanăn mâo đei liê prăk kăk ôh. dŭm čô nao hgŭm hlăm anăn knŏng phung găp djuê hlăm gŏ sang, ƀĭng găp, kyuanăn kơ prăk kăk lehanăn hruê mmông amâo lu ôh, dưi mkŏ mjing hlăm aguah amâodah tlam mmăt. Tui hluê klei jing bruă mă hlăm gŏ sang.

Ară anei, mâo lu ung mô̆ mrâo mkŏ mjoing klei bi kuôl ung mô̆ hŏng knhuah hdĭp mrâo hlăm đa đa anôk, Knăm juă hbâo kpur mkŏ mjing ƀiă leh mkă hŏng êlâo. Ƀiădah hŏng mnuih Jrai, knăm juă hbâo kpur amâo dưi kƀah ôh hlăm klei hdĭp dhar kreh, ai tiê, bi êdah klei siam hlăm bruă ngă grăp hruê mơ̆ng ƀuôn sang.