VOV4.Êđê-  Hruê 5/9, mbĭt hŏng kluôm ala čar. Hđeh sang hră krĭng Lăn Dap Kngư ăt mâo knăm pŏk kčưm thŭn hriăm mrâo ka tuôm mâo wưng thŭn hriăm 2021-2022 hlăm wưng klei ruă tưp Covid-19 dôk dleh ktuê dlăng. Jih čar ti krĭng Lăn Dap Kngư ka mâo ôh mnuih mâo klei ruă tưp Covid-19 hlăm yang ƀuôn, ƀiădah čiăng gang mkhư̆ klei ruă tưp, knăm pŏk kčưm thŭm hriăm mrâo wưng thŭn 2021-2022, knơ̆ng bruă mtô mjuăt lehanăn sang hră mơar čar KonTum ăt ngă hŏng êlan online, êlan mđung rup, sang mđung asăp blŭ mơ̆ng sang mđung rup, asăp blŭ lehanăn hlăm mbah internet. Thŭn hriăm mrâo čar Kon Tum mâo êbeh 164.000 čô hđeh sang hră mơ̆ng hđeh điêt truh kơ gưl 4. Leh knăm pŏk kčưm, hruê anei, 6/9 hđeh sang hră hlăm čar ngă mâo hruê hriăm tal êlâo hŏng êlan online. Čar jao leh kơ dŭm sang hră mơar mkŏ mjing mbha êpul čiăng mâo êlan hriăm online mâo boh tŭ dưn hĭn.

Kon Tum hruê mphŭn pŏk thŭn hriăm mrâo amâo mâo hđeh sang hră

Ăt mkŏ mjing Knăm mphŭn pŏk thŭn hriăm hŏng hdră yuôm bhăn, khuăt, hlăm êlan mđung rup ti mmông anăn mtam, êbeh 392 êbâo čô hđeh sang hră ti 714 sang hră ti Gia Lai mprăp mŭt hlăm thŭn hriăm mrâo. Mơ̆ng hruê 6-9, bruă sang hră Gia Lai mkŏ mjing mtô leh anăn hriăm hluê  2 hdră. Hđeh ti 2 alŭ wăl dôk hluê ngă Asăp mtrŭn mrô 16 mơ̆ng Khua Knŭk kna jing Ƀuôn prŏng Pleiku leh anăn wăl krah Phú Túc (kdriêk Krông Pa) srăng hriăm online. Phung hđeh hlăm dŭm alŭ wăl mkăn srăng hriăm sa anôk. Dŭm sang hră ti Gia Lai ăt mprăp leh kdrăp mnơ̆ng, mkra mđĭ anôk bruă hâo hưn mtô mblang, srăng mtô bi hriăm online hlăm boh klei čiăng êdi.

 Gia Lai mphŭn pŏk thŭn hriăm mrâo hluê hdră online mơ̆ng Sang hră gưl 3 chuyên Hùng Vương (ƀuôn prŏng Pleiku)

Ti Dak Lak, dŭm sang hră ăt mkŏ mjing hdră mphŭn pŏk thŭn hriăm mrâo 2021-2020 nhlăm aguah 5-9 hŏng hdră online, rơ̆ng êđăp ênang, khuăt, klă sĭt, bi êdah ai tiê bi đru, mđĭ ai hđeh sang hră, nai mtô hgao klei dleh dlan bi leh bruă mtô leh anăn hriăm. Thŭn hriăm anei, čar Dak Lak mâo êbeh 450 êbâo čô hđeh sang hră dŭm gưl.  Ti anăp boh klei ruă tưp, čar bi kdung mmông hriăm truh hruê 15-9, čiăng kơ bruă sang hră leh anăn mnuih ƀuôn sang mâo wưng mprăp bi jăk djăp klei găl  mtô leh anăn hriăm.

Hđeh sang hră Dak Lak mphŭn pŏk thŭn hriăm mrâo hŏng hdră online

 Hŏng klei mprăp jăk, Dak Nông jing sa čar ti Lăn Dap Kngư mkŏ mjing Knăm mphŭn pŏk thŭn hriăm mrâo ti anôk bruă sang hră, ƀiădah dôk bi kbưi. Hjăn ti Lâm Đồng srăng brei hđeh nao sang hră hlăm hruê 15-9 leh anăn mkŏ mjing mphŭn thŭn hriăm mrâo hlăm hruê 18-9.

Pô mblang: Y-Ƀel Êban-  H’Zawut Ƀuôn Yă