VOV4.Êdê- Thŭn anei jing thŭn tal 2 đrông, Sang yang Hùng amâo mkŏ mjing Knăm bi hdơr hruê djiê kyua klei ruă Covid 19. Kơ knăm bi hdơr hruê djiê thŭn anei, Anôk kriê dlăng Wăl knhuah gru hƀuê ênuk Sang yang Hùng gĭt gai čih mkra leh dŭm mta bruă phŭn, rơ̆ng kjăp klei êđăp ênang hlăm hdră gang mkhư̆ klei ruă tưp. Msĕ si hmei hưn mthâo leh mơ̆ng akŏ hdră mđung, ară anei alum kơ ƀĭng găp mđing hmư̆ klei bi blŭ hrăm hŏng Lê Trường Giang – Khua Anôk kriê dlăng Wăl knhuah gru hƀuê ênuk Sang yang Hùng kơ klei anei.

-Akâo kơ ih, yăl dliê lăng thŭn anei si bruă Êpul mkŏ mjing mâo hdră klă ênŭm kơ bruă mkŏ mjing knăm ngă yang bi hdơr kơ hrue mtao Hùng Vương?

Lê Trường Giang: Knăm ngă yang kơ phung mtao Hùng thŭn anei knŏng mkŏ mjing ti kdrêč ngă yang đuič, ƀiădah amâo mâo mkŏ mjing ôh hlăm knăm hlăp mbul. Kyua klei ruă tưp covid 19, ƀrư̆ ƀrư̆ dơ̆ng dưi ksiêm dlăng, snăn hrue 6/3 hlue mlan ƀlĕ thŭn Tân Sửu mkŏ mjing knăm ngă yang čuh brui mngưi kơ atâo atiêt phung Mtao Hùng pô mkŏ mjing lăn čar.

Hrue 10/3 hlue mlan ƀlĕ msĕ si hdră êlâo dih mâo êpul khua kiă kriê Đảng, knŭk kna, phung khua kiă kriê car, dŭm knơ̆ng dhar bruă nao ngă yang. Siămdah, hŏng klei jing ară anei, hmei mâo leh klei akâo kơ knơ̆ng bruă sang čư̆ êa čar ăt lŏ mbŏ dŭm bruă msĕ si mgrông êdjha lehanăn êpul 100 čô anak mơ̆ng sang mtao mgrông hla čhiăm gru kklei mơak.

Kdrêč ngă yang mâo pŏk ngă hlăm dŭm kdriêk, wăl krah čiăng bi êdah ai tiê hdơr knga mơ̆ng anak čô ară anei.

-Tui si hdră, mâo đa đa bruă dhar kreh yang ƀuôn ăt mâo mkŏ mjing hlăm wưng anei. Si êpul mkŏ mjing ngă čiăng dưi gang mkhư̆ klei ruă tưp êjai, lehanăn phung tue hiu čhưn ăt mâo klei êđăp ênang mơh?

Lê Trường Giang: Knơ̆ng bruă dhar kreh mjuăt asei mlei hiu čhưn ênguê gĭr giua leh anôk bruă mdah klei kdŏ mmuiñ Việt Trì ăt mkŏ mjing mơh klei mdah xoan. Bi ti sang ngă yang Lãi Lèn ăt mkŏ mjing mơh klei muiñ xoan tơdah mâo tue nao dlăng.

Ti sang Yang Hùng, mkŏ mjing klei tông hgơr kông, tăp kniêm, kdŏ rối êa lehanăn klei bi lông đŭng ƀêñ čưng, ƀêñ dày kñăm kỉê pioh knhuah gru dhar kreh.

Thŭn dih dôk hlăm wưng bi ktlah yang ƀuôn snăn amâo mâo phung ƀuôn sang bi hriê ôh. Mơ̆ng akŏ thŭn truh kơ ară anei hmei hlăk dơ̆ng drông tue hriê čhưn. Hrue 6/3 lehanăn 7/3 jing hlăm knăm năm, lehanăn knăm kjuh. Hmei đăo tĭng tue hriê čhưn lu hĭn snăn prăp êmiêt mbha êlan, lehanăn ngă wang bi ktlah čiăng rơ̆ng dưi gang mkhư̆ klei ruă tưp êjai mơh. Mbĭt anăn lŏ mâo klei hâo hưn mtô mblang hŏng hdră mđung asăp kơ tue hlăm alŭ wăl knhuah gru.

-Lač jăk kơ ih lu!