VOV4.Êđê - Klei hâo hưn tal sa, mâo lu mnuih mđing, anăn jing 144 čô mnuih hdĭp hlăm krĭng wăl kwang dar ti alŭ 189/1 Mai Hắc Đế, ƀuôn hgŭm Tân Thành, ƀuôn prŏng Ƀuôn Ama Thuôt, čar Dak Lak mâo klei tŭ ksiêm mkă amâo djŏ ôh kman Sars CoV-2.  Khădah, đăm ngă ngơi mang ôh, bruă gang mkhư̆ klei ruă Covid-19 ăt lŏ dơ̆ng mâo bruă sang čư̆ êa leh anăn dŭm bruă djŏ tuôm ti čar Dak Lak pŏk ngă bi jăk.

Leh hmao ƀuh sa čô mâo klei ruă tưp Covid-19, knơ̆ng bruă mdrao mgŭn čar Dak Lak mâo leh hră mtrŭn truh kơ dŭm anôk bruă djŏ tuôm hlăm bruă mgaih msir dŭm bruă akâo mdei, amâo mkŏ mjing ôh dŭm êpul nao hlăm klei hriăm, hiu dlăng, čhưn ênguê čiăng mâo ênŭm ênoh mnuih hlăm bruă pioh mdrơ̆ng lehanăn gang mkhư̆ klei ruă tưp Covid-19.

Tui hluê anăn, mtă kơ dŭm anôk bruă amâo mgaih msir dŭm klei akâo mdei kơ dŭm čô khua kiă kriê lehanăn mă bruă knŭk kna (knŏng brei mdei kơ dŭm čô mâo klei mjêč). Amâo dưi mkŏ mjing ôh êpul nao hiu hlăm klei hriăm, hiu dlăng, hiu chưn ênguê (hlăm ala čar lehanăn êngao kơ ala čar) hlăm wưng mâo klei arưp srăng mâo klei đĭ lar mơ̆ng klei ruă tưp Covid-19. Bi mklin mnuih mă bruă čiăng rơ̆ng kơ bruă gang mkhư̆ klei ruă tưp Covid-19, rơ̆ng kơ ênoh mnuih mă bruă čiăng đru kơ bruă gang mkhư̆ klei ruă tưp Covid-19, klei ksiêm mkă kman hlăm dŭm anôk bruă mdrao mgŭn, mâo klei hmao đru kơ bruă răng mgang, kriê dlăng lehanăn mđĭ klei suaih pral kơ mnuih ƀuôn sang hlăm alŭ wăl čar.

Mbĭt hŏng anăn mâo klei ksiêm dlăng, ƀư̆ mkra dŭm bruă tui ngă klei bhiăn hlăm klei gang mkhư̆ klei ruă tưp Covid-19 hlăm dŭm anôk bruă, khua kiă kriê dŭm anôk bruă, anôk bruă mâo bruă klam ti anăp khua knơ̆ng bruă mdrao mgŭn kơ dŭm čô mnuih mă bruă knŭk kna lehanăn mnuih mă bruă amâo tui ngă djŏ dŭm hdră êlan hlăm klei gang mkhư̆ klei ruă tưp Covid-19. Ba jao kơ pô ksiêm dlăng mơ̆ng knơ̆ng bruă mdrao mgŭn gĭt gai, bi mguôp hŏng dŭm anôk bruă djŏ tuôm kơ bruă ksiêm dlăng, mkŏ mjing bruă tui ngă dŭm boh phŭn gĭt gai hlăm bruă mdrơ̆ng lehanăn gang mkhư̆ klei ruă tưp Covid-19 hlăm dŭm anôk bruă, anôk bruă ksiêm dlăng, mâo klei bi kmhal kơ dŭm êpul êya, mnuih ngă soh hŏng hdră êlan gang mkhư̆ klei ruă tưp.

Knơ̆ng bruă mdrao mgŭn mtă kơ dŭm anôk bruă srăng lŏ mkŏ mjing, tui ngă djŏ dŭm hdră êlan gang mkhư̆ klei ruă tưp Covid-19 tui hluê klei gĭt gai mơ̆ng dŭm anôk bruă mâo klei dưi, klei gĭt gai mơ̆ng bruă sang čư̆ êa čar hlăm hră mtrŭn mrô 3743, hruê 04/05/2021 mơ̆ng bruă sang čư̆ êa čar lehanăn dŭm klei gĭt gai mơ̆ng knơ̆ng bruă mdrao mgŭn hlăm bruă gang mkhư̆ klei ruă tưp Covid-19. Tui hlue dŭm bruă mă, bruă klam lehanăn ênoh muih mă bruă hlăm dŭm anôk bruă, srăng ngă klei bi mguôp hŏng dŭm êpul êya, anôk bruă mkăn, alŭ wăl srăng mâo dŭm hdră êlan,  dŭm boh phŭn čiăng rơ̆ng kơ bruă mdrao mgŭn hlăm dŭm hruê mông ngă klei ruah pô bi ala Quốc Hội gưl 15 lehanăn HĐND dŭm gưl hlăm alŭ wăl čar wưng thŭn 2021-2026.

Kơ dŭm anôk mdrao klei ruă, knơ̆ng bruă mdrao mgŭn mâo klei mtă srăng mâo klei dăp djŏ mnuih mă bruă hŏng ênoh mnuih ruă, mâo klei bi mbha mmông mă bruă, mbha êpul lehanăn bi mlih nanao mmông mă bruă, dăp hdră amra mghaih msir hlăm bruă gang mkhư̆ klei ruă tưp Covid-19, hlăm anăn mâo dŭm hdră êlan kơ bruă mlih mmông mă bruă, bi mlih êpul mă bruă, ba mđuê̆ mnuih ruă, tŭ drông mnuih ruă, mnơ̆ng bơ̆ng huă, ksiêm mkă kman, gang mkhư̆ klei tưp lar kman hlăm dŭm anôk mdrao mgŭn tơdah mâo klei ruă klei ruă tưp Covid-19 hlăm anôk mdrao mgŭn anăn.

Ti anăp klei ƀrư̆ hruê ƀrư̆ dleh ksiêm dlăng mơ̆ng klei ruă tưp Covid-19, bruă sang čư̆ êa kdriêk Čư̆ Mgar, čar Dak Lak dôk mđĭ hĭn bruă tui ngă djŏ dŭm hdră êlan mdrơ̆ng lehanăn gang mkhư̆ klei ruă tưp. Mơ̆ng hruê ti kdriêk leh mâo sa čô mnuih đing mâo klei ruă tưp, amâo klei bi knăl msĕ hŏng klei ruă tưp Covid-19 lehanăn wĭt mơ̆ng ƀuôn prŏng Đà Nẵng, khădah, hlăm klei ksiêm mkă kman tal 1 amâo ƀuh kman ôh, ƀiădah klei arưp huĭdah srăng mâo klei đĭ lar klei ruă tưp dôk mâo, êpul gĭt gai bruă gang mkhư̆ klei ruă tưp Covid-19 ti kdriêk Čư̆ Mgar pŏk leh dŭm bruă ngă hlăm bruă gang mkhư̆ klei ruă tưp lŏ đĭ sa hnơ̆ng. Mbĭt hŏng anăn lŏ mâo klei ksiêm dlăng, hyuă kjăp dŭm hdră êlan gang mkhư̆ klei ruă tưp hlăm alŭ wăl, boh nĭk nak hlăm dŭm anôk kreh mâo klei bi kƀĭn lu mnuih. Ti sang mnia blei wăl krah Quảng Phú- anôk mnia mblei phŭn ti kdriêk Čư̆ Mgar, êpul kriê dlăng sang mnia mblei mâo tiŏ nao leh mnuih hiu lač kơ mnuih ƀuôn sang, mtrŭt mjhar phung čhĭ mnia guôm bô̆ mta êjai dôk čhĭ mnia, blŭ hrăm hŏng phung hiu dlăng, amâo dôk bi ngi lu mnuih msĕ hŏng êlâo…Dŭm hdră êlan anei mâo klei tŭ ư mơ̆ng mnuih ƀuôn sang lehanăn phung čhĭ mnia. Dŭm anôk mnia hlăm bruă amâo tŭ yuôm ti alŭ wăl kdriêk mmông anei ăt dôk mâo klei kiêm dlăng kjăp, tui ngă djŏ hdră êlan gang mkhư̆ klei ruă tưp Covid-19…. Jih jang 40 anôk mmuñ karaoke, bi-za mâo leh klei kđăl kƀăng lehanăn mdei mă bruă.

Ti anăp klei ƀrư̆ hruê ƀrư̆ dleh ksiêm dlăng mơ̆ng klei ruă tưp Covid-19, bruă sang čư̆ êa čar Dak Lak mâo leh hră mtrŭn kơ bruă mkŏ mjing dŭm hdră êlan gang mkhư̆ klei ruă tưp Covid-19 leh mâo mnuih ruă hlăm čar. Tui hluê anăn čar Dak Lak gĭt gai dŭm bruă sang čư̆ êa hlăm dŭm kdriêk, să srăng mâo klei bi mguôp hŏng dŭm anôk bruă djŏ tuôm srăng tui ngă dŭm hdră êlan kăm ghă, gang mkhư̆ klei ruă tưp Covid-19 mơ̆ng 12 mông mmăt krah mlam hruê 10/05/2021 truh kơ hruê lŏ mâo klei hâo hưn mrâo.