VOV4.Êđê - Čiăng rơ̆ng mâo djăp pui mklă đru kơ klei bi lông hriăm jih gưl 3 thŭn 2021 mâo klei jăk, knơ̆ng bruă pui kmlă Dak Nông mŏ mjing leh hdră êlan mprăk pui kmlă, čiăng mâo ênŭm pui kmlă kơ dŭm anôk ngă klei bi lông. Klei bi lông hriăm jih gưl 3 thŭn 2021, čar dak Nông mâo 7 êbâo čô hđeh sang hră nao hgŭm hlăm 18 anôk bi lông.

Čiăng mâo ênŭm pui kmlă êjai ngă klei bi lông, knơ̆ng bruă pui kmlă lač, amâo srăng l ngă ôh bruă khăt lehanăn mkra wĭt êlan pui kmlă msĕ hŏng hră mâo leh êlâo anăn hlăm hruê dôk ngă klei bi lông. Êngao kơ anăn, knơ̆ng bruă lŏ gĭt gai kơ dŭm êpul êya ngă bruă mâo klei blŭ hrăm klă anăp hŏng dŭm anôk ngă klei bi lông lehanăn dŭm alŭ wăl mâo anôk bi lông, srăng mđrăm mbĭt nao ksiêm dlăng huôm bi hrŏ hnơ̆ng pui kmlă, êlan klei pui hlăm sang hră mơar, čiăng dưi hmao ƀuh hnưm dŭm anôk amâo jăk lehanăn lŏ mkra wĭt, bi mlih dŭm kdrăp yua pui amâo jăk. Mbĭt hŏng anăn, hlăm dŭm anôk ngă klei bi lông, knơ̆ng bruă pui kmlă srăng dăp mnuih mă bruă ti anăn lehanăn dŭm êpul mă bruă hmar hlăm dŭm anôk bi hrŏ hnơ̆ng pui kmlă, čiăng dưi mgaih msir prăl tơdah mâo klei jhat, lehanăn lŏ mâo pui kmlă hlăm dŭm anôk ngă klei bi lông hnưm hĭn.

Lê Huy Thiệp, k’iăng khua knơ̆ng bruă pui kmlă čar Dak Nông brei thâo: “Knơ̆ng bruă mâo leh dŭm hdră êlan nao ksiêm dlăng dŭm anôk ngă klei bi lông, čiăng rơ̆ng mâo klei êđăp ênang kơ pui kmlă hlăm dŭm hruê bi lông. Knơ̆ng bruă gĭt gai leh dŭm êpul êya bruă pui kmlă hrăm mbĭt nao ksiêm dlăng dŭm êlan klei pui, anôk bi hrŏ hnơ̆ng pui kmlă, čiăng mgaih msir dŭm anôk amâo jăk čiăng đru kơ klei bi lông. Anôk bruă mprăp leh kdrăp masin mkra mjing pui kmlă hlăm dŭm anôk bi lông čiăng rơ̆ng klei êđăp ênang kơ klei bi lông bi ruê̆ klei hriăm gưl 3.”