VOV4.Êđê- Aguah mbrue (6/9), ti Hà Nội, Knơ̆ng hgŭm mnuih ngă bruă Việt Nam mkŏ mjing leh knăm mtrŭt mjhar klei bi ktưn “Mnuih ngă bruă mâo klei thâo gĭr, hŏng klei mbruă jih ai tiê mdrơ̆ng bi dưi hŏng klei ruă tưp Covid 19” truh hŏng 83 anôk mkŏ hlăm kluôm ala. Gưl mâo klei ruă tưp tal 4 jing mơ̆ng hrue 27/4 truh kơ ară anei hlăk dleh dưi ksiêm dlăng, hmăi amâo mâo jăk kjham hĭn êdi hŏng klei hdĭp phung ƀuôn sang, lehanăn kơ klei mđĭ kyar bruă duh mkra ala ƀuôn. Khădah snăn, hlăm jih jang bruă kđi čar, lehanăn phung ƀuôn sang hlăm kluôm ala mâo leh klei bi mguôp, sa ai tiê ngă djăp hră gang mkhư̆ klei ruă tưp. Ti anôk mtrŭt mjhar, Khua knơ̆ng kiă kriê êpul hgŭm mnuih ngă bruă Việt Nam Nguyễn Đình Khang iêu mthưr kơ jih jang knuă druh, mnuih ngă bruă hlăm kluôm ala dưn yua ai tiê thâo khăp kơ lăn čar, bi mguôp sa ai tiê, gĭr hĭn, kut kat hĭn găn bi dưi klei dleh dlan, klei lông dlăng, jih ai tiê bi ktưn kñăm ba wĭt klei tŭ dư̆n dưi msưh kdŭn klei ruă tưp, krŭ wĭt bruă duh mkra./.

Pô mblang: Y-Khem Niê