VOV4.Êđê-  Aguah 23-8, Êpul kahan knhăk Lăn Dap Kngư ngă knăm trŭn ngă bruă ba 100 čô knuă druh, lĭng kahan nao ti čar Bà Riạ- Vũng Tàu đru čar anei gang mkhư̆ klei ruă Covid-19. 100 čô knuă druh, lĭng kahan hlăm Êpul kahan knhăk Lăn Dap Kngư hŏng djăp ênŭm kdrăp mnơ̆ng mâo 5 boh êdeh thơ̆ng kơ bruă ba truh ti čar Bà Riạ- Vũng Tàu đru kơ mnuih ƀuôn sang tinei gang mkhư̆ klei ruă Covid-19.

 Thượng tá Diêm Công Toàn- Khua êpul kahan knhăk Lăn Dap Kngư brei thâo, “kyua klei suaih pral, klei hdĭp mnuih ƀuôn sang jing êlâo hĭn: Hŏng ai tiê “mdrơ̆ng hŏng klei ruă tưp msĕ si bi kdơ̆ng hŏng phung roh”, phung knuă druh lĭng kahan bi mklă anei jing bruă klam bi blah hlăm ênuk êđăp ênang, jing bruă klam hŏng lăn čar leh anăn yang ƀuôn. Êlâo anăn 310 čô knuă druh, lĭng kahan mơ̆ng anôk bruă anei nao đru leh ƀuôn prŏng Hồ Chí Minh nao ngă bruă msĕ snăn.

H Zawut pô mblang