VOV4.Êđê- Hlăm dua thŭn 2020-2021, čar Dak Lak găn leh klei ruă tưp mdua hŏng 2 gưl bluh mâo klei ruă Covid-19 leh anăn lu alŭ wăl mâo klei ruă buôr čuh kô̆ kŏng đŏk huĭ hyưt. Hrăm mbĭt hŏng phung aê mdrao, knuă druh mdrao mgŭn leh anăn dŭm êpul bruă djŏ tuôm, phung čih klei mrâo lu anôk bruă klei mrâo ti čar amâo uêñ kơ klei dleh dlan, huĭ hyưt, ba anăp ngă bruă ti anôk mâo klei ruă tưp, hmao hâo hưn kơ klei ruă tưp leh anăn gĭr gang mkhư̆. Klei yuôm bhăn hĭn hlăm  phung čih klei mrâo anăn mâo phung mniê. Hŏng klei jhŏng, thâo răng, hơĭt ai tiê leh anăn thâo mbruă, dŭm knuh mnga siam hlăm phung čih klei mrâo đru mguôp bi hrŏ klei rŭng răng ti krah klei ruă tưp.

Thŭn 2020 – 2021, sa êpul mâo Nam Trang (VOV Lăn dap kngư), Kim Oanh, Hoàng Tuyết (Hră klei mrâo Dak Lak), Hải Yến (Sang mđung asăp – mđung rup Dak Lak) (DRT) lui leh lu gru kruăk jăk siam hŏng ƀĭng mă bruă kyua diñu hrăm mbĭt nao ngă bruă hlăm dŭm anôk dôk bluh mâo klei ruă tưp huĭ hyưt msĕ si klei ruă bŏk buôr čuh kô̆ kŏng đŏk lehanăn klei ruă Covid 19. Jing phung mniê nao hlăm hdră bruă anei, diñu mprăp mbĭt hŏng êpul djŏ tuôm nao ngă bruă djŏ mmông hlăm krah mlam, čŭt h’ô čhum ao răng mgang asei mlei krĭp, nao ti krah sang mnia, kdrŭn mjưh êdeh amâo dah ti dŭm krĭng bi ktlah čiăng thâo klă dŭm klei hâo hưn mrâo hĭn kơ klei ruă tưp. Diñu ăt ‘’djŏ mmông mliêt, djŏ mmông lŏ ƀuh”, djŏ mmông diñu dôk ti anôk ksiêm dlăng klei ruă Covid 19 ti krĭng knông lăn, djŏ mmông dôk ti sa să krĭng tlaih kbưi mâo lu mnuih mâo klei ruă bŏk buôr čuh kô̆ kŏng đŏk. Ktuê ksiêm găp mă bruă mbĭt hluê hŏng dŭm klei čih mrâo hĭn lehanăn ktuê êlan nao mă bruă hlăm hla pŏk web yang ƀuôn, hưn mthâo mnĭt mmông suaĭ êmăn lehanăn dŭm mnĭt mmông jăk siam – đăo knang kơ anăp, hmư̆ găp mă bruă mbĭt mđung asăp ti mmông anăn mtam ti krah krĭng dôk kwang dar, pô čih klei mrâo Nguyễn Thảo (VOV ti Gia Lai) mgei ai tiê lač”

“Tinei, kâo lehanăn ƀĭng găp mă bruă ăt khăp m’ai kơ bruă ƀiădah ƀuh di amai Trang ti Dak Lak kâo mgei ai tiê êdi. Krah mlam di amai ăt nao mă bruă ti krĭng kwang dar, anôk huĭ tưp klei ruă Covid 19 lehanăn huĭ srăng bi ktlah jih êpul”.

Boh tŭ dŭm hruê mlam ngă bruă hŏng jih ai tiê mơ̆ng 4 čô mniê mă bruă klei mrâo, amâo djŏ knŏng dŭm êtuh klei hâo hưn mrâo kơ klei ruă tưp, kơ dŭm klei gĭr mơ̆ng anôk bruă mdrao mgŭn mbĭt hŏng dŭm anôk bruă djŏ tuôm, ƀiădah lŏ mâo lu klei čih mgei ai tiê kơ dŭm klei bi đru, čung ba mơ̆ng dŭm anôk bruă duh mkra, jih jang mnuih ƀuôn sang, hrăm mbĭt găn hgao hruê mlan dleh dlan. Kơ dŭm klei huĭ hyưt, klei suaĭ êmăn leh nao čih grăp klei hưn lač kơ klei ruă tưp, pô čih klei mrâo Kim Oanh – Hră klei mrâo Dak Lak hơ̆k m’ak lač:

“Ti hră klei mrâo Dak Lak mâo kâo lehanăn Hoàng Tuyết kreh čih hưn lač kơ bruă mdrao mgŭn. Dŭm klei hâo hưn kơ klei ruă bŏk buôr čuh kô̆ kŏng đŏk hmei dua s’aĭ ngă, ƀiădah kreh čih lu anăn hưn mthâo pô čih, kyua mă anăn pô lu đei gŏ sang huĭ mơh pô mă bruă ti krĭng dôk mâo klei ruă tưp. Boh sĭt gơ̆ suaĭ êmăn mơh, khă snăn klei huĭ hyưt ăt dưi gang mkhư̆ tuič hnơ̆ng mơh kyuadah hmei hluê ngă kjăp nanao klei kčah mtrŭn kơ hdră gang mkhư̆ klei ruă tưp, dưi răng mgang msĕ si phung nai aê mdrao lehanăn mnuih mă bruă mdrao mgŭn hlăm krĭng dôk mâo klei ruă.

Aê mdrao Nay Phi La, Khua knơ̆ng bruă mdrao mgŭn, K’iăng khua Anôk bruă gĭt gai hdră gang mkhư̆ klei ruă Covid 19 čar Dak Lak brei thâo, hlăm ktuê êlan mdrơ̆ng hŏng klei ruă tưp bŏ hŏng klei dleh dlan, ñu lehanăn phung găp mă bruă mbĭt ƀuh mâo klei bi đru, đru gui klei ktrŏ mơ̆ng phung mă bruă klei mrâo lehanăn jih jang mnuih ƀuôn sang, boh nik phung mniê mă bruă klei mrâo nao mbĭt hŏng diñu msĕ si Kim Oanh, Hoàng Tuyết, Hải Yến, Nam Trang. Nay Phi La mgei ai tiê lač :

“Bruă phung knuă druh nao truh ti krĭng mâo klei ruă ăt mâo nanao phung mă bruă klei mrâo nao mbĭt, kyua anăn hmei ƀuh hmei amâo mâo nao hjăn ôh. Phung mă bruă klei mrâo gĭr nanao, dôk guôn bi mklă klei hâo hưn klă nik, ngă kơ êpul mă bruă mdrao mgŭn lehanăn phung ayŏng adei đru bruă dưi mtrŭt mđĭ mơh ai tiê..”

Phung mniê čih klei mrâo nao ti anôk phŭn mdrơ̆ng hŏng klei ruă tưp

Pă čô Nam Trang, Kim Oanh, Hoàng Tuyết, Hải Yến jing phung amĭ dôk rông ba anak điêt s’aĭ. Nao mă bruă ti dŭm anôk dôk bluh mâo klei ruă ăt ba lu klei huĭ hyưt mơh. Khă snăn, msĕ hŏng lu phung mă klei mrâo mkăn, diñu thâo diñu jing pô bi mkŏ klei hâo hưn, mâo klei đua klam hŏng dŭm bruă mâo hlăm yang ƀuôn. Klei ruă tưp huĭ hyưt, diñu hĭn mơh gĭr mă bruă knuă čiăng pral mâo klei hâo hưn klă nik. Pô čih klei mrâo Nam Trang, mơ̆ng Sang mđung asăp blŭ Việt Nam ti lăn dap kngư lač snei:

“Kâo tuôm lač leh hŏng Oanh, Tuyết lehanăn amai adei mă bruă mbĭt: Drei nao akâo kơ čar mkăp brei sa adŭ mdei hjăn, dôk tinăn yơh, amâo lŏ wĭt ti sang ôh, kăn duah nao hiu hlăm tač, kăn nao kơ anôk bruă mơh. Gơ̆ lač snăn đuič, ƀiădah jih jang hmei thâo s’aĭ, dŭm anôk bruă nah gŭ - mnơ̆ng dhơ̆ng – adŭ mdei hlăm čar păt dah dưi mkăp yua kơ hdră bi ktlah, gang mkhư̆ klei ruă Covid 19 s’aĭ. Bruă gang mkhư̆ klei ruă ăt dôk sui. Jih sa êpul, mâo anak điêt s’aĭ, amâo dưi lui anak pô ti sang hjăn ôh. Kyua anăn, jih jang hmei ăt gĭr nao ti anôk bluh mâo klei ruă msĕ si phung knuă druh mă bruă mdrao mgŭn, hluê ngă kjăp hdră pô msĕ si phung knuă druh bruă mdrao mgŭn kreh ngă. Anôk bruă mdrao mgŭn ăt mkăp čhiăm guôm ƀô̆, čhum ao răng mgang h’ô sa blư̆, mjing klei găl kơ hmei dưi ngă bruă, kyua anăn h’ĭt mơh ai tiê. Čang hmăng klei ruă anei pral dưi msưh kdŭn”.

Phung mniê čih klei mrâo ktuê dlăng boh klei čiăng hmao hâo hưn

Khădah lač mâo dŭm klei dleh dlan, ƀiădah jih êpul diñu ăt hơ̆k kdơ̆k blŭ tlao êjai truă nanao čhiăm guôm ƀô̆. Dăl 3 mlan êgao, diñu ăt snăn nanao. Klei ruă Covid 19 ti Dak Lak êgao leh 21 hruê amâo lŏ mâo mnuih ruă mrâo, klei ruă bŏk buôr čuh kô̆ kŏng đŏk dưi msưh kdŭn, Nam Trang- Kim Oanh dưi lŏ čih leh lu hĭn kơ bruă hiu čhưn ênguê ti ƀuôn prŏng ƀuôn Ama Thuôt, Hải Yến lui leh lu mmông čih kơ êpul lĭng kahan – kahan ksiêm. Êpul mniê phung čih klei mrâo kkuh phung găp hŏng klei hơ̆k tlao m’ak hlak. Diñu čang hmăng klei ruă tưp anei dưi msưh kdŭn jih čiăng dưi toh hĕ čhiăm guôm ƀô̆, mă dŭm pŏk rup siam mơ̆ng phung mniê. Diñu lač snăn, ƀiădah grăp čô mnuih ƀuh s’aĭ, diñu dôk hdĭp hlăm dŭm thŭn mlan jăk siam hĭn mơ̆ng klei hdĭp pô, hgao klei dleh dlan lông dlăng, sa ai hgŭm mguôp lehanăn đăo knang kơ êdei anăp jăk siam./.

                                                    Pô mblang: H’Nêč Êñuôl