VOV4.Êđê- Aguah hruê 6/9, hŏng klei gĭt gai mơ̆ng Khua knŭk kna Phạm Minh Chính, knŭk kna bi kƀĭn leh grăp gưl mlan 8 thŭn 2021 čiăng bi trông kơ bruă duh mkra – ala ƀuôn mlan 8 lehanăn 8 mlan thŭn 2021; bruă hluê ngă Hdră mtrŭn mrô 01/NQ-CP mơ̆ng Knŭk kna, bruă duh mkra – ala ƀuôn thŭn 2021 lehanăn klei čih mkra hdră kčah mđĭ kyar bruă duh mkra – ala ƀuôn thŭn 2022; bruă hluê ngă hdră duh bi liê knŭk kna thŭn 2021, hdră kčah duh bi liê knŭk kna thŭn 2022; hdră lŏ mkŏ dap bruă duh mkra wưng thŭn 2021 – 2025 lehanăn dŭm bruă yuôm bhăn mkăn. Ti anôk bi kƀĭn, Khua knŭk kna Phạm Minh Chính mtă kơ Phŭn bruă Ngăn prăk bi mklin jih klei ba mdah mơ̆ng dŭm knơ̆ng, dhar bruă, alŭ wăl kơ prăk duh kơ hdră gang mkhư̆ klei ruă tưp; Phŭn bruă Mnuih ngă bruă, kahan êka êkeh lehanăn yang ƀuôn ksiêm dlăng lehanăn thiăm mbŏ hdră mtrŭn kơ êpul nao hlăm hdră gang mkhư̆ klei ruă tưp; Phŭn bruă êlan klông dŭ mdiăng ksiêm dlăng bi mklă, rơ̆ng klei êngiê hlăm bruă dŭ mdiăng mnơ̆ng dhơ̆ng. Mtă brei pral ksiêm dlăng boh klei kñăm mtrŭt mđĭ kyar bruă duh mkra – ala ƀuôn hlăm boh klei mrâo./.

                                                    Pô mblang: H’Nêč Êñuôl