VOV4.Êđê - Tlam hruê 11-8, ti gŭ klei gĭt gai mơ̆ng Khua knŭk kna Phạm Minh Chính, Knŭk Khua Knŭk kna bi kƀĭn kơ hdră gang mkhư̆ klei ruă Covid-19, klei đĭ kyar bruă duh mkra - ala ƀuôn mlan 7 leh anăn 7 mlan thŭn 2021; dŭm bruă klam, hdră msir phŭn ruh mgaih klei dleh dlan, mđĭ kyar bruă duh mkra- ala ƀuôn dŭm mlan knhal jih thŭn 2021 hluê hdră online plah wah Knŭk kna hŏng dŭm alŭ wăl kluôm ala. Hluê si Khua knŭk kna, anei jing dua bruă yuôm bhăn leh anăn bi mguôp tliêr kjăp. Hluê si klei gĭt gai mơ̆ng Khua Knŭk kna, khua gĭt gai dŭm čar, ƀuôn prŏng leh anăn phung hlăm knŭk kna kƀĭn hlak mblang klei tŭ dưn leh anăn wăt klei êdu kƀah hlăm hdră hluê ngă bruă klam hlăm wưng êgao; mă klei hriăm, boh nik hlăm hdră gang mkhư̆ klei ruă Covid-19 leh anăn krŭ wĭt bruă mkra mjing, mnia blei; đaŏ knăl boh klei, boh nik dŭm klei dleh dlan găl ênưih, lông dlăng, bi trông kơ dŭm hdră êlan, bruă klam, hdră msir hluê ngă hlăm dŭm mlan knhal jih thŭn 2021.

H Zawut pô mblang