VOV4.Êđê - Tui si hdră mtrŭn mơ̆ng knŭk kna, Ƀuôn prŏng Hồ Chí Minh, ktưn bi dưi ksiêm dlăng kjăp klei ruă tưp êlâo kơ hrue 15/9/2021. Dŭm čar: Bình Dương, Long An; Đồng Nai ktưn ksiêm dlăng bi kjăp klei ruă tưp êlâo kơ hrue 1/9/2021. Dŭm čar, ƀuôn prŏng mkăn ktưn bi dưi ksiêm dlăng êlâo kơ hrue 25/8/2021. Čiăng lŏ dơ̆ng jih ai tiê gang mkhư̆, msưh kdŭn, anăp truh kơ klei kiă kriê kjăp klei ruă tưp covid 19. Hdră mtrŭn lač klă, jih jang hdră mjêč bi ngă mtam. Msĕ si: Ba yua djăp hdră gang mkhư̆, ngă klei bi ktlah yang ƀuôn, hŏng klei sĭt êmĭt, hŏng klei ktang, mâo klei mtrŭt nanao, ksiêm dlăng djăp mta, djăp hdră mdrơ̆ng hŏng klei ruă tưp, kñăm mghaih msir pral tơdah klei ruă tưp lŏ đĭ hĭn. Hlăm jih jang alŭ wăl kiă kriê hlue ngă hdră êlan “Nao hlăm djăp êlan, khŏk ƀăng hlăm grăp boh sang, ksiêm dlăng hlăm grăp čô mnuih”, čiăng thâo ƀuh, mghaih msir mtam hlei pô tuôm wĭt leh mơ̆ng alŭ wăl mâo klei ruă tưp, amâodah mơ̆ng anôk mkăn hriê, bi djŏ hŏng hdră mtrŭn mơ̆ng alŭ wăl, mghaih msir ktang hlei pô ngă soh, truh kơ klei phat kđi tŭ tui si klei bhiăn hŏng hlei pô bi kdơ̆ng, ngă bi kpăk bruă dŭm dhar bruă dôk mdrơ̆ng hŏng klei ruă tưp./.

Y Khem pô mblang