VOV4.Êđê - Aguah mbruê 11/8, kčưm pŏk leh klei kƀĭn tal êlâo mơ̆ng knŭk kna wưng păn bruă 2021-2026 čiăng tui ngă hdră mtrŭn hlăm klei kƀĭn kluôm mơ̆ng Đảng lehanăn hdră mtrŭn mơ̆ng bruă kƀĭn ala gưl 15 kơ bruă mđĭ kyar bruă duh mkra ala ƀuôn 5 thŭn wưng thŭn 2021-2025. Klei kƀĭn dưi mkŏ mjing hlăm online hŏng dŭm alŭ wăl hlăm ala čar, ti gŭ klei gĭt gai mơ̆ng khua knŭk kna Phạm Minh Chính. Blŭ pŏk klei bi kƀĭn, khua knŭk kna Phạm Minh Chính mñă klă, knŭk kna gưl 15 mâo bruă klam hlăm wưng tar rŏng lăn lehanăn ala čar mâo dŭm klei găl lehanăn klei dleh dlan, klei lông dlăng nao mbĭt, boh nĭk jing klei ruă tưp Covid-19 hŏng kman mrâo Delta dôk dleh dưi ktuê dlăng dlông rŏng lăn lehanăn Việt Nam, ngă klei hyưt kơ klei suaih pral, klei hdĭp anak mnuih lehanăn hmăi kjham truh kơ bruă duh mkra – ala ƀuôn hlăm ala čar. Hŏng klei hgŭm mơ̆ng khua gĭt gai Đảng lehanăn ênŭm phung khua êmua bruă Đảng, knŭk kna gưl 15 pŏk ngă klei kƀĭn tal êlâo, anei jing klei bi kƀĭn hƀuê ênuk, hŏng klei gĭr mlih mrâo knŭk kna, mâo boh tŭ dưn, kyua mnuih ƀuôn sang. Klei kƀĭn bi trông, bi tŭ ư dŭm boh klei yuôm bhăn hĭn hlăm ala čar ti 5 thŭn kơ anăp.

Y Bel pô mblang