VOV4.Êđê - Čiăng đru leh anăn hmao ngă bruă, tŭ dưn kơ hdră gang mkhư̆ klei ruă Cpvid-19 ti ƀuôn prŏng Hồ Chí Minh leh anăn dŭm alŭ wăl nah Dhŭng, Khua knŭk  kna mrâo bi klă leh hră mơar mrô 970 kơ bruă mkŏ mjing “êpul ngă bruă mjêč” gang mkhư̆ klei ruă Covid-19. Khua knŭk kna mtă kơ phung Khua phŭn bruă: Khua phŭn bruă lĭng kahan; Khua phŭn bruă tuh tia mnia blei; Khua phŭn bruă lŏ hma leh anăn mđĭ kyar krĭng ƀuôn sang; Khua phŭn bruă êlan klông dŭ mdiăng; Khua phŭn bruă rŭ mdơ̆ng; Khua phŭn bruă hâo hưn leh anăn mtô mblang; Khua phŭn bruă  mnuih mă bruă -kahan êka êkeh leh anăn ala ƀuôn mơ̆ng bruă pô klam, klei dưi jao bruă, mkŏ mjing mtam “êpul mă bruă mjêč” gang mkhư̆ klei ruă tưp Covid-19 mơ̆ng grăp Phŭn bruă, bi hgŭm tliêr kjăp hŏng ƀuôn prŏng Hồ Chí Minh leh anăn dŭm alŭ wăl nah Dhŭng, boh nik dŭm alŭ wăl dôk hluê ngă Asăp mtrŭn mrô 16 pral msir mgaih mtam dŭm bruă mâo hlăm hdră gang mkhư̆ klei ruă tưp leh anăn dŭm bruă djŏ tuôm. Anei jing bruă yuôm bhăn êdi, mjêč; Khua knŭk kna mtă kơ phung Khua phŭn bruă kƀĭn gĭt gai hluê ngă, hnưm mđĭ lar bruă klam mơ̆ng Êpul ngă bruă mjêč hĭn anei.

H Zawut  pô mblang