VOV4.Êđê- Aguah hruê 6/9, Anôk bruă sang čư̆ êa čar Kon Tum mkŏ mjing leh Knăm atăt Êpul knuă druh bruă mdrao mgŭn mơ̆ng čar nao hlăm hdră gang mkhư̆ klei ruă Covid 19 ti čar Bình Dương. Hluê si hdră kčah, Êpul 30 čô nai aê mdrao, phung mă bruă mdrao mgŭn mơ̆ng čar Kon Tum srăng hluê ngă bruă klam ti Bình Dương hlăm wang 30 hruê.

Êlâo kơ nao, Êpul dưi mjuăt bi hriăm 6 hruê mâo Knơ̆ng bruă mdrao mgŭn čar Kon Tum mkŏ mjing, mđing kơ hdră ksiêm bi mklă, dŏng mdrao; hdră mă mta ksiêm dlăng, hluê ngă hdră ksiêm dlăng kman SARS-CoV-2 hŏng kdrăp Realtime PT- PCR. Blŭ hrăm mtrŭt mđĭ ai phung nai aê mdrao, knuă druh bruă mdrao mgŭn êlâo kơ nao, Lê Ngọc Tuấn, Khua anôk bruă sang čư̆ êa čar Kon Tum čang hmăng Êpul ngă bruă srăng mđĭ lar ai tiê hgŭm mguôp, klei đua klam, msir mghaih klei dleh dlan hlăm klei hluê ngă bruă klam, kriê kjăp klei suaih pral lehanăn rơ̆ng klei êđăp ênang kơ pô.

Čiăng mđĭ ai, đru kơ Êpul hlăm wưng hluê ngă bruă ti Bình Dương, Anôk bruă sang čư̆ êa čar Kon Tum, Knơ̆ng bruă mdrao mgŭn, Êpul hgŭm mnuih mă bruă čar, Anôk bruă mguôp hnư sâm Ngọc Linh Kon Tum mđup brei leh kơ grăp čô mnuih lehanăn Êpul mă bruă jih jang 285 êklăk prăk./.

                                                    Pô mblang: H’Nêč Êñuôl